amalinks wokungena

Breaking News

Broad Alliance: Kazesulwe Izijeziso Zenotho Ezetheswa Abakubandla leZanu PF


UMongameli Emmerson Mnangagwa ngesikhathi ekhankasela ukwesulwa kwezijeziso zenotho

Abakhankasela ukuthi kwesulwe izijeziso zenotho ezafakelwa inkokheli yebandla leZanu PF, asebehlale phose umnyaka wonke phandle kwamawofisi esigodlo seMelika kwele Zimbabwe, banika iziphathamandla zikahulumende weMelika incwadi ejulileyo eveza ukuthukuthela kwabo ngezijeziso lezi.

Amalunga enhlanganiso yeBroad Alliance Against Sanctions ahambise incwadi le esigodlweni seMelika ngoLwesine isithi kumele uhulumende kaMongameli Donald Trump abaphendule kunsukwana ezilandelayo.

Incwadi le eyePetition yamukelwe ngobona ngezombangazwe esigodlweni seMelika, uMnu. Jeremy Presto, othe uzayinika uhulumende wakhe. Katshongo ukuthi uhulumende kaTrump uzakwenzani ngodaba lolu.

Obona ngezokwethulwa kwemibiko kunhlanganiso yeBroad Alliance Against Sanctions, uNkosazana Sally Ngoni, uthi benze lokhu ngenxa yokuthi izijeziso lezi zikhahlameza uzulu hatshi inkokheli yebandla leZanu PF.

Ilizwe leMelika lithi inkokheli yebandla leZanu PF yephula ilungelo likazulu njalo yehluleka ukwenza ukhetho olubalulekileyo sonke isikhathi. Ibutho leZimbabwe labulala abantu abambalwa ngomnyaka ka2018 lanyekenye ababetshengisela emigwaqweni.

UNkosazana Ngoni uthi ukukhahlanyezwa kwabantu akuqali ngebandla leZANU PF lohulumende kaMnangagwa.

Abasekela amabandla amanengi aphikisayo bathi iyamangalisa imibono yeBroad Alliance Against Sanctions ngoba uzulu ukhahlanyezwa ngabalandeli bebandla leZanu PF lohulumende kaMnangagwa. Kodwa kulabanye njalo abasekela okufiswa yinhlanganiso le abagoqela abakubandla leEconomic Freedom Fighters Zimbabwe.

UMnu. Siphosenkosi Matshokomola Bhalule, unobhala jikelele webandla leli, uthi lanxa beyisekela limibono yeBroad Alliance Against Sanctions eyokuthi kumele zesulwe kokuphela zijeziso lezi, uhulumende laye kumele alungisise umnotho obhidlikayo ukuze abantu bakwele Zimbabwe bathole impilakahle.

UBhalule uthi limqotho lelo elikhulunywa ngabe Broad Alliance Against Sanctions elokuthi izijeziso zenotho zibhidliza isizwe hatshi abalandeli bebandla leZanu PF lamankampani agoqela eyeZimbabwe Defence Industries.

Uhulumende weMelika lamalunga edale leSenate Foreign Relations Committee bathi ngamanga aluhlaza tshoko ukuthi izijeziso zenotho zibhidliza umnotho welizwe leZimbabwe. USenator Jim Risch okubandla lama Republicans loMnu. Chris Coons okubandla lama Democrats, abakuhlangothi ledale leli eleSubcommittee on Africa and Global Health Policy, bathi kumele uhulumende kaTrump angayekethisi izijeziso lezi ngoba akukabi lenguquko elizweni selokhu ibutho lasusa esikhundleni owayengumongameli umuyi uRobert Mugabe ngomnyaka ka2017.

Sebecele abaphathintambo bakahulumende ukuthi bakhuthaze uTrump ukuthi afakele abanye abakubandla leZanu PF ezinye izijeziso zenotho besithi bakhahlameza uzulu okumangalisayo. Lokhu kusekelwa nguMnu. Daniel Molokele, isikhulumeli sebandla leMDC elikhokhelwa nguMnu. Nelson Chamisa.

UMolokele uthi abantu abanengi bangabayanga kwele Zimbabwe ngenxa yombuso omubi webandla leZanu PF.

Abakubandla leZanu PF bathi bayakusekela okwenziwa yinhlanganiso yeBroad Alliance Against Sanctions. UMnu. Mabutho Moyo, obona ngenhlelo ezitshiyeneyo kubandla leZanu PF, uthi kumele zesulwe izijeziso zenotho lezi.

Uhulumende kaMnangagwa usanda kubambisana lenhlanganiso yeSouthern African Development Community emkhankasweni wokuthi kwesulwe izijeziso zenotho. Ingcwethi kwezombangazwe zithi lokhu okwenziwa libandla leZanu PF yikuvala abantu amehlo ngoba kulobukhohlakali obumangalisayo kuhulumende kaMnangagwa obenza umnotho welizwe ungathuthuki ngemfanelo.

Abenhlanganiso yeBroad Alliance Against Sanctions Bafuna Kwesulwe Izijeziso Zenotho
please wait

No media source currently available

0:00 0:09:13 0:00


Facebook Forum

XS
SM
MD
LG