Umgadli weqembu lomdlalo wenguqu eleHighlanders uPrince ‘Mgadafi’ Dube ubikwa esengayadlala elizweni leChina.
Imibiko etholakala ebulenjini bohlobo lweTwitter ithi uDube usevumelane lelinye lamaqembu adlala kusigaba saphezulu kwele China ukuba abe ngumdlali walo.
UDube ubhekise amabombo kwele China ensukwini ezedluleyo ndawonye lomgadli weqembu leTriangle United uDelic Murimba njalo ongumqondisi wabadlali uJoe Mhondiwa, owenza lomsebenzi wokudingela abadlali imisebenzi, ukhiphe umbiko kuTwitter esithi amajaha lawa aphethwe nguye njalo asethole amathuba awokuyadlala kwele China.
Namuhla kuphume imibiko kuFootball Daily Zimbabwe ethi abaphathi baka Dube bathi lumdlali usethole iqembu lokudlalela khonale kwele China kodwa akuzange kuvezwe ukuba yiliphi iqembu lelo.
UDube ulokhu engumdlali weqembu leHighlanders njalo kuzabe kumele leloqembu lase China likhulumisane lele Highlanders mayelana lokuba uthengiswa ngemalini phambilini kokuthi ayedlala kulelolizwe.
Abanye babadlali bakwele Zimbabwe abake bayadlala kwele China ngababalisa uWilfred Mugeyi, uAgent Sawu, uNewton Katanha kanye loNyasha Mushekwi yena odlalela iqembu leZhejiang Greentown.
UDube ngomunye wabadlali akade kuthiwa mhlawumbe bangathengwa liqembu leFC Platinum ngemva kokuba kube lemibiko ethi umqeqetshi weqembu leHighlanders uHendrikus Pieter de Jongh usezakuba ngumqeqetshi waleloqembu.
Lumqeqetshi uvalelise abalandeli beqembu leBosso ekhasini lakhe eleTwitter okudale ukuba abantu bahle bathi usesiya kuqembu leFC Platinum kodwa isikhulumeli seqembu lelo uChido Chizondo ukulandule lokho.
Kusenjalo, ophethe isikhundla esokuba ngumqeqetshi weqembu leFC Platinum uLizwe Sweswe uthi ukufika emaphethelweni kwemidlalo yesigaba seCastle Lager Premier Soccer League kuzakwenza badlale ngcono kumncintiswano wokudinga intshantshu zezwekazi lase Africa.
Iqembu leFC Platinum lihlezi emsileni wengalane yemiklomelo yesibaya sika Group B lingela ngitsho lowodwa umklomelo ngemva kokunqotshwa kumidlalo emibili eseliyidlale kulumkhankaso.
Leliqembu linqotshwe nge 2 ka 1 ngele Al Hilal elakwele Sudan emdlalweni walo wakuqala kwathi emdlalweni wesibili litshaywe nge 3 ka nya liqembu leEtoile Sportive du Sahel elase Tunisia.
Kusasa ntambama iqembu leFC Platinum lizadibana leqembu leAl Ahly elakwele Egypt khonale kwele Gipite emdlalweni walo wesithathu.
Umqeqetshi weqembu leFC Platinum uLizwe Sweswe utshele umsakazo weStudio 7 ukuba ukungaqhubi kuhle kweqembu lakhe kudalwe yikuba bebexotshanisa impala ezimbili ngesikhathi bedlala imidlalo yabo le eyedluleyo.
“Amalungiselelo ethu ahamba kuhle. Sitholile isikhathi esokuthi siphumule ngoba sibe lesikhathi eside sihlezi endizamtshineni ngoba ngapha kukhatshana. Asiselankinga eyokuxotshana lenyoni ezimbili ngesikhathi sinye ngoba ensukwini ezedluleyo besizama ukuvikela isicoco sethu sePSL siphinde njalo siphatheke kulumncintiswano.
Khathesi sekungcono ngoba sesibhekane lomncintiswano weCAF kuphela njalo ngendlela esilungiselele ngayo siyathembisa ukwenza ubungcono bethu loba nje sidlala leqembu esiphakamise linkezo kanengi,” kutsho uSweswe.
Umdlalo wakusasa uzadlalwa ngehola lethoba munwe munye ebusuku njalo uSweswe uthi iqembu leFC Platinum like lathola ithuba elokuba lizilolonge ngesikhathi esifanayo ngoLwesine.
Komunye umdlalo wesibaya sika Group B iqembu leEtoile Sportive du Sahel lizadibana lele Al Hilal ngehola lesithupha kusasa ntambama.
Iqembu leEtoile Sportive du Sahel yilo elihlezi phezu kwengalane lilemiklomelo yesibaya sika Group B lilemiklomelo eyisithupha.
Endaweni yesibili kuleqembu leAl Hilal lona elilemiklomelo emithathu njalo lilingene ngemiklomelo leqembu elihlezi endaweni yesithathu eleAl Ahly kodwa umehluko kuyikuba ele Al Hilal lihlohle kathathu laphinda lahlohlwa kathathu ikanti eleAl Ahly lona lihlohle kabili laphinda lahlohlwa kabili.
Emsileni wengalane kuhlezi iqembu leFC Platinum lona elingakadobhi ngitsho lowodwa umklomelo.