Ekuqhubekeni kobudlwangudlwangu obubangelwa ngamasotsha etshaya abantu lokubabopha abanye sebesithi lokhu kufana xathu lokwenzakala ngesikhathi sombhuqazwe we Gukurahundi.
Lokhu bakutsho ngoba abetheswa icala lokwenza umbhuqazwe lo yibo abalokhu bekhokhela ingatsha zamapholisa lamasotsha.
Ukuhlaziya loludaba sixoxe lengcwethi ezicubungula ezombusazwe, uMnu. Cassius Jayz Simana Mpofu endawonye loMnu. George Mkhwananzi onguye osungula lingxoxo.
UMkhwananzi uthi: “Ukuthatha umumo okhona uwuqathanise lowe Gukurahundi kungaba yinto embi kakhulu ngoba kusuke kwehlise isisindo lohlonzi lokubulawa kwabantu olwabakhona ngesikhathi se Gukurahundi.”
Uthi kubi okwenzakalayo ekhaya kodwa akungeke kwaqathaniswa ngoba okwe Gukurahundi kwakungumbuqazwe owawunjonge ukutshaya uqothule abantu abathile ngoko hlanga lwabo.
Uthi okukhona kathesi yikwethuka nje okwabangelwa yikuqoloho kwabantu.
UNpofu yena uthi akungeke kuqathaniswe le Gukurahundi ngoba ngalesiya sikhathi abantu bagejiswa amangcwaba abo basebefaka phakathi ngobunengi.
“Laphana sabono into embi, enzima ebuhlungu engeke yaqathaniswa lokwenzakala kathesi,” kutsho uMpofu.
Imbiko ophuma kunkampani ye I-TV News uthi kulabesifazana abalitshumi lanye abadlwengulwe ngamasotsha kusukela ngeviki edluleyo, njalo abanye babo bachasise okwabehlelayo. Inkampani le ithi isikhweze loludaba kuhulumende, yena othi uzadingisisa ngalo ukwenzela ukuthi abazatholakala belecala bajeziswe.
Ukuze sihlaziye ukuthi udlakela oluselizweni luthinta njani abasifazana, sixoxe loNkosazana Dorcas Sibanda, ilunga ledale lephalamende, ekubandla leMDC.