amalinks wokungena

Lenza Kahle Iqembu Lokuntsheza leZimbabwe

  • Joseph Njanji

UNkosikazi Lorna Margeret Riley omunye walabo ababona ngezemidlalo yokuntsheza kwele Zimbabwe.

Ikusasa yomdlalo wokuntsheza kwele Zimbabwe ikhanya inhle kakhulu nxa kukhangelwa indlela iqembu leZimbabwe eliqhube ngayo kumncintiswano we Cana Zone 4 osanda kwedlula.

Iqembu ebelimele ilizwe le Zimbabwe emncintiswaneni we Cana Zone IV libuthelele imiklomelo efika phose inkulungwane ezintathu (2,958.50) kuthi ele Zambia lona libuthelele imiklomelo ephezu kwenkulungwane ezimbili (2,295.50) ikanti ele South Africa lona lithole imiklomelo efika phose inkulungwane ezimbili (1,939).

Loba kunjalo iqembu le South Africa yilo eliqede lihlezi phezu kwengalane yemendulo ngemva kokuba abadlali balo bethole imendulo zegolide ezingamatshumi amane lantathu (43), ezombala wesiliva ezingamatshumi amabili lesithupha (26) kuthi ezombala wethusi zibelitshumi.

Kundawo yesibili engalaneni yemiklomelo kuleqembu le Zimbabwe lona elithola imendulo zegolide ezingamatshumi amabili lantathu, ezesiliva ezingamatsumi amathathu lesikhombisa kuthi ezombala wethusi iqembu le Zimbabwe lithole ezingamatshumi amathathu lathoba minwe mbili.

Ekhuluma lentatheli ekufikeni emaphethelweni kwemidlalo ye Cana Zone IV, umphathintambo wogatsha lwezemidlalo lokuzilibazisa uMakhosini Hlongwane, utshayele ihlombe iqembu le Zimbabwe ngokudlala elikwenzileyo.

UHlongwane uthi, impumela le inhle kakhulu ngoba selokhu ilizwe laba yingxenye yeCana besingazake sidlale kanje. Osekumele sikwenze yikuba sisebenze gadalala ukuze laba abathole imendulo zesiliva lezombala wethusi bathole imendulo zegolide kusasa.

"Njengomphathintambo obona ngezemidlalo umsebenzi owenziwe liqembu le Zimbabwe ungijabulise kakhulu yikho-ke ngikhangelele ukuba umdlalo wokubhukutsha uyale ulokhu uqhubekela phambili."

“Omunye wabadlali abadlale indima enkulu ekuphemeleleni kweqembu le Zimbabwe nguntombazana osakhulayo uRobyn Lee yena othole imendulo zegolide ezinhlanu,” kusho uHlongwane.

URobyn Lee uthi, kuyamuthokozisa kakhulu nxa igama lakhe liphakanyiswa njalo ulethemba lokuba laba abancane kulaye bazakhuthazeka nxa bebona eqhuba kuhle njengoba lakhe walikhuthazeka nxa ebukele uKirsty Coventry.

URobyn Lee uhlala elizweni le Australia njalo uthi ngaphandle kokubhukutsha ufuna ukuqala izifundo ezokuba ngumongikazi.

Kucele labafana omunye wabadlali abaqhube kuhle ngu Liam O’Hara yena othole imendulo zegolide ezine njalo othi ukhuthazwe kakhulu yikubhukutsha phambi kwabasekeli bakhe njengoba esehlala elizweni le South Africa.

“Bekukuhle kakhulu ukuthi ngibhukutshe ngingekhaya kulabasekeli abanengi. Lokhu kungenze ngaba lamadlabuzane njalo ukuba khona kwabasekeli kwenze umehluko omkhulu ekuncintiseni kwami,” kusho uLiam O’Hara.

UO’Hara uphinde wathi Ilizwe le Mauritius liphutshe lisendaweni yesine engalaneni yemiklomelo kuthi ele Kenya belikundawo yesihlanu, Kundawo yesithupha kulelizwe lase Botswana kuthi endaweni yesikhombisa kuleqembu le Mozambique.

Iqembu elimela ilizwe le Namibia liphutshe likundawo yethoba minwe mbili njalo ngaphansi kwalo kuleqembu lase Uganda eliqede likundawo yethoba munwe munye.

Endaweni yetshumi kutholakala ilizwe le Malawi kuthi ngaphansi kwalo kuleqembu elimela ilizwe le Seychelles elisendaweni yetshumi lanye.

Iqembu elimela ilizwe le Angola liqede lisendaweni yetshumi lambili kuthi iqembu eliphutshe lisemsileni wengalane ngele Tanzania.

Ngomnyaka ozayo limidlalo izaqoqwa lilizwe le Malawi.

Facebook Forum

XS
SM
MD
LG