amalinks wokungena

Abalezimota Ezithwala Uzulu Banceda Abadilikelwa Yimizi eTsholotsho


Amalunga eTsholotsho Transporters Association anika uzulu uhluphekileyo ukudla.

lnhlanganiso yeBulawayo Nyamandlovu Tsholotsho Transporters’ Association (BNTTA) isiphe izakhamizi ezadilikelwa yimizi eTsholotsho esezihlala enkambeni yeSipepa Flood Victims Centre usizo lwempahla.

Ngakwelinye icele, abantu asebebadala labaphila lobugoga sebesole kakhulu indlela uhlangothi oluncedisa ngezikhathi zengozi enjengeyezulu lesikhukhula, olweCivil Protection Unit, olusebenza ngayo besithi bayababandlulula.

Lokhu kuvela ngesikhathi likhuphuka inani labantu abehlelwe yingozi edalwe zimpopoma zamanzi eTsholotsho esezitholiswa usizo enkambeni yeSipepa Flood Victims Camp.

UMnu. Mzingeli Dube, olilunga leBNTTA, uthi loluncedo lubuthaniswe ngamalunga enhlanganiso yakhe ngenjongo yokusiza imuli ezibhekane lengozi yempopoma zamanzi.

Kusenjalo, inhlanganiso ezinengi kanye labantu lokhe betheleka enkambeni le bezokupha abantu usizo olwehlukeneyo kodwa abahlala kuleyondawo bakhala ngokuthi izisebenzi zeCPU ziyaqambula izipho.

Banengi abazama ukunceda abantu abahluphekayo eTsholotsho abadilizelwa izindlu zimpopoma zamanzi.
Banengi abazama ukunceda abantu abahluphekayo eTsholotsho abadilizelwa izindlu zimpopoma zamanzi.

​UMfundisi John Moyo wenkonzo yeBaptist eTsholotsho uthe sebethole imbiko yempahla ezanyamalalayo wathi bazakuya khulumisana lenduna ukwenzela ukuba impahla elithwa nguzulu lamankampani yabelwe uzulu ngendlela efaneleyo.

Osakhulayo, uWillard Nyathi, uthe amalunga eCPU abonakala ephuma lempahla ebusuku.

Lokhu kugcizelelwe nguNkosikazi Constance Ngwenya, osuka KoMahlaba ophila lobugoga, othe kabanikwa impahla ngemfanelo.

UMnu. Musa Ndlovu, umgcinisihlalo wekhomithi yeSipepa Flood Victims Camp, uthe balenhlupho ezifana lokusilela kwengubo lezicathulo.

Uqhubeke esithi kuzabanzima ukuba abantu basuke emizini yabo besiya lapho abazakuyahlaliswa khona ngoba basebegebhe lemigodi yamanzi. ngoba uHulumende engakaze abagebhele.

Abantu abasenkambeni bahleli kodwa abakhululekanga inengi lithi lapho uhulumende afuna baye hlalakhona kukhatshana lamasimu abo.

Amantombazana asethombile lawo akhala ngokusilela kwemvunulo yabomama abasesikhathi becela ukuba inhlanganiso zabomama zibancede.

Uzulu laye uyasola isipho esakhutshwa nguMongameli Robert Mugabe, besithi kasihambelani lenhlonipho alayo.

UMongameli Mugabe wapha amanzi, amabhisikiti lamachips abasakhulayo.

Uzulu usephinde wasola lendlela uhulumende ayehluleka ngayo ukusiza abantu abawelwa yingozi yempopoma zamanzi njengoba kukhanya engani sefake umthwalo wosizo olufunakalayo kunhlanganiso ezizimele zodwa.

Lomgwaqo oya eTsholotsho usumagodigodi okwenza ukuthi abafuna ukupha uncedo bathwale nzima nxa befuna ukuyafika eSipepa Flood Victims Camp.

Facebook Forum

XS
SM
MD
LG