Inhlanganiso yabosomabhizimusi, eye Confederation of Zimbabwe Industries (CZI) ithi ilizwe lilahlekelwe yimali engedlula izigidi ezingamakhulu amathathu - $300 million - kumalanga amathathu okutshengisela.
Ukukhuphulwa kwentengo yamafutha okuyikho okubangele ukutshengisela okulobudlwangudlwangu, kutshiye umnotho welizwe wona ovele umangobongobo, usuwonakale ngamandla ngoba izitolo zagqekezwa zatshiywa zingasasebenzi.
Isakhamuzi seSizinda koBulawayo, uMnu. Raymond Phiri, uthi inengi emalokitshini selimele liyethenga phose yonke impahla edolobhoni ngoba izitolo sezibetha umoya kulandela ukutshengisela okwenziwayo.
Uhulumende uthe uzaphathisa abagqekezelwa izitolo ngemali yokuthi bathenge impahla kodwa akucacanga ukuthi uzakwenza ngempela lokhu.
Ingcwethi ecubungula ezombusazwe, uMnu. Rejoice Ngwenya, uthi intengo yempahla ezitolo ebivele iphezulu kakhulu, izaqhubeka ikhuphuka ngamandla ngoba abagqekezelwa izitolo bezafuna ukuthola inzuzo.
Uhulumende usefake amabhasi aweZimbabwe United Passenger Company (ZUPCO) lamanye awabantu mathupha ukuthi athwale uzulu ngedola elilodwa umango obhadaliswa amadola amabili kumbe amathathu ngamakhombi njengendlela yokuphathisa uzulu obesethwele nzima ngentengo yamakhombi.
Kodwa uNgwenya uthi lokhu akutshengisi ubuciko bukahlumende ngemizamo yokuvuselela umnotho welizwe. Kuzavusela umnotho yini ukufakwa kwamabhasi eZUPCO?
Enye njalo ingcwethi ecubungula ezomnotho, uMnu. Masimba Kuchera utshele iStudio 7 ukuthi kunengi uhulumende amele akwenze ukuthi avuselele umnotho welizwe.
Umphathintambo wezemali, uMnu. Mthuli Ncube, nguye osesemhlanganweni weDAVOS World Economic Forum lapho akade elubhekise khona uMongameli Emmerson Mnangagwa elubhekise kungakaqhamuki udlakela elizweni.
UNcube uzathola na uncedo lokuphathisa umnotho welizwe?
