amalinks wokungena

Breaking News

Umdlali Weqembu leSan Diego eMelika uAbel Sebele Owazalelwa eZimbabwe Kasekho


Abel 'Shadow' Sebele played for San Diego Sockers, USA. (Photo: Official website, San Diego Sockers)

Isizalwane seZimbabwe, uAbel ‘Shadow’ Sebele, obedlalela iqembu lenguqu eleSan Diego Sockers eMelika kasekho.

USebele ubhubhe engozini yemota emgwaqweni edolobheni le Old Town.

Umbiko osanda kwethulwa liqembu leli uthi bamadolo nzima ngokubhubha kuka Sebele osanda kukhethwa ukuthi adlalele iSan Diego Sockers.

Umqondisi weqembu leli, uMnu. John Kentera uthe, “Sidanile kakhulu ngokubhubha kwakhe. USebele obebizwa ngokuthi nguShadow ubeyindoda elenhliziyo enhle kakhulu. Ubethandwa ngumuntu wonke.

“Siyamkhumbula njalo sikhulekela imuli yako Sebele ngalokhu osokubehlele. Siyamkhumbula uShadow okade ethanda ukubobotheka lokuphilisana kuhle labantu bonke.”

USebele wazalwa ngomnyaka ka 1989 edolobheni lako Bulawayo wasesiya kwele Melika ngomnyaka ka 2005 esethole imali yemfundo yokuqhuba ezomdlalo wenguqu. Wake wadlalela iqembu labasakhulayo kuHighlanders Football Club.

Wathi efike eMelika wahlala okwesikhatshana edolobheni leWashington DC lapho ayezilolonga khona labadlali beqembu le DC United.

Usebele wadlala kuqembu le West Virginia University kusukela ngomyaka ka2009 kusiyafika umnyaka ka2012.

Wadlalela njalo iqembu eleWichita B52 engakayingena kwele San Diego Sockers. Lobanje ubedlala phakathi kwenkundla encedisa amavimbi labahlohlayo ebejayele ukulithela emambuleni nxa engathola ithuba.

Wathola ibizo lokuthi nguShadow kulandela ayekwenza kumnewabo owayehlala ekhwapheni lakhe sonke sikhathi.

XS
SM
MD
LG