Uhulumende uthi uMnu. John Mangudya, usibalukhulu webhanga lesizwe ele Reserve Bank of Zimbabwe, uzengezelelwa isikhathi sokukhokhela lelibhanga okweminye iminyaka emihlanu.
Lokhu kulandela imbiko ememetheke ebulenjini ngoLwesithathu ekade isithi uMangudya engaba esephelelwe ngumsebenzi ngoba ihlandla lakhe leminyaka emihlanu selifike emaphethelweni.
Kodwa uMnu. George Charamba, isikhulumeli sikaMongameli Emmerson Mnangagwa, utshele iphephandaba leHerald ngoLwesine ukuthi uMnangagwa uyasuthiseka ngendlela uMangudya asebenza ngayo ngokunjalo kuzamele aqhubeke esikhundleni lesi.
“UMongameli Mnangagwa usekuveze mgceke ukuthi uyasuthiseka ngomsebenzi kasibalukhulu webhanga leReserve Bank, njalo kasoze amsuse esikhundleni kodwa uzengezelela ihlandla lakhe,” kutsho uCharamba.
Ukuhlaziya loludaba sixoxe lengcwethi ecubungula ezombusazwe, uMnu. George Mkhwananzi endawonye lowalwa impi yenkululeko, uMnu. Max Mkandla.
