Sekuqhamuke udlakela phakathi kwezizalwane zakwamanye amazwe lezakwele South Africa elokitshini leDiepsloot eJohannesburg ngemva kokubulawa kwepholisa elibikwa libulewe yisizalwane seZimbabwe.
Kudlakela lolu oluqale izolo ntambama, izizalwane zakwele South Africa zitshaya phansi ngenduku zisithi abakwamanye amazwe, ikakhulu abaselizweni okungekho emthethweni, kabaphume baphele kulel’ilokitshi.
Omunye okhokhela izakhamizi zaleli lokitshi igama lakhe elingavezwanga ukubeke kwacaca ukuthi bafunani.
“Abantu bethu bayabulawa ngabantu bokuza laba. Sifuna kuthunyelwe amabutho lamapholisa babuthwe bonke bahambe.”
Izitalada zonke kuleli lokitshi bezivaliwe ngamatshe, ingcekeza lamathaya abaselwe umlilo. Inengi labantwana kabahambanga esikolo kanye lenengi labasebenzayo njengoba imota, amabhasi lemitshova obekuzama ukungena kule indawo bekujikijelwa ngamatshe.
Kudutshulwe ipholisa ngoLwesihlanu lafa ngesikhathi amapholisa egijimisa izigebenga ebezidingwa ngecala lokubulala. Esinye salezo zigebenga ezibanjiweyo sekuvele ukuthi yisizalwane seZimbabwe.
Izizalwane zakwele South Africa zithi phezu kwaleli pholisa kubulewe futhi ezinye izakhamizi ezimbili, lakho abathi kwenziwe ngabakwamanye amazwe.
Isizalwane seZimbabwe, uMnu. Mehluli Ncube ohlala eDiepsloot, uthi loba bekungakahlaselwa muntu, okwamanje abalasiqiniseko sokuthi loludlakela luzaphetha ngani.
“Into ekhona abantu bakwele South African okwamanje balwa labantu bokuza bethi bafuna umuntu ongelawo amaphepha. Sebezenzela bona umsebenzi wamapholisa oweHome Affairs. Kukhanya angathi kusaqhubekela phambili ngoba le helicopter nayi lapha indiza emoyeni. IMall ivaliwe ngale ngaseDiepsloot.”
Umgcinisihlalo wenhlanganiso yeZimbabwean Community in South Africa, uMnu. Ngqabutho Mabhena, uthi kulusizi ukuthi ihlekana lezizalwane zeZimbabwe elikhethe ukuba yizigangi lingcolisa igama laye wonke umuntu wokuza.
“Siyakugxeka lokho njalo sidlulisa amazwi enduduzo kumuli yepholisa leli elibuleweyo, njalo sibiza isizalwane zaseZimbabwe ukuthi kumele sekele udlame lolu. Kumele sekele ukuganga lokhu okwenzakalayo. Njalo sifisa ukusebenzisana lamapholisa eSouth Africa ukuthi siqede ubugebengu lobu obukhona emphakathini wamalapha esihlala khona.”
Imizamo yokuthola ukuphawula kwamapholisa loba uhulumende ibingakaphumeleli. Kodwake uMongameli Cyril Ramaphosa ngeviki ephelileyo utshele umkhokheli kahulumende wakwele Ethopia, uMnu. Abiy Ahmed, ukuthi uhulumende wakhe uzasebenza gadalala ukuqeda udlakela olubhekiswe kwabakwamanye amazwe.