Inhlanganiso yeZifa ithi iqembu elimela ilizwe leZimbabwe kumncintiswano weAfrica Cup of Nations lizaqhubekela phambili liphatheka kulumncintiswano loba nje besekulemibiko ethi alisoze lidlale lele Democratic Republic of Congo ngeSonto.
Okhokhela iqembu lakwele Zimbabwe eliphatheka kumncintiswano walonyaka owe Africa Cup of Nations oqhutshelwa elizweni lase Egypt, uFarai Jere, utshele intathelizindaba zemidlalo ezihambe leqembu ukuba akusilo qiniso ukuba besebecabanga ukuphuma kulumncintiswano.
UJere utsho lokhu ngemva kwemibiko ephume kuphephandaba leHerald oluthi inhlanganiso yeZifa ibisithumele isikhulumeli sayo, uXolisani Gwesela, ukuba ayebuza ukuba bengahlawuliswa imali engakanani nxa bengaphindela ekhaya bengakaqedi imidlalo yezibaya.
Loludaba belusithi lokhu kungenxa yokungezwani okukhona phakathi kwabadlali lenhlanganiso yeZifa phezu kwemali okumele itholwe ngabadlali laba.
“Lolu ludaba olukhulu kakhulu okokuthi aluba kuliqiniso ukuba besesithumele umuntu ukuthi ayesikhulumela labe CAF bebengeke balubandezele kodwa beluzahle lusabalale lugcwale umhlaba wonke jikelele. Iqiniso elikhona yikuba lokhu akuzange kwenzakale futhi njalo akusoze kwenzakale.”
Omunye wentathelizindaba zemidlalo ezikwele Egypt yena, ongathandanga ukubethwa ngegama, uthe uJere ubatshengisele lobufakazi obokuthi abadlali sebethole phose inkulungwane ezilitshumi lathoba minwe mbili phakathi kwenkulungwane ezingamatshumi amabili lane zama dola abazithenjiswayo.
Iqembu leZimbabwe likhangelelwe ukudlala lele Democratic Republic of Congo ngeSonto emdlalweni walo owokucina owesibaya sika Group A.
Abafana beZimbabwe kumele banqobe ele DRC ukuze bathuthukise amathuba abo awokuyadlala kusigaba esilandelayo esomncintiswano bengelinye lamaqembu aphutshe esendaweni yesithathu engalaneni alemiklomelo ethe xaxa.
