Umkhokheli wenhlanganiso yomdlalo wenguqu elizweni eye Zimbabwe Football Association, uFelton Kamambo, uthi ulethemba lokuba umqeqetshi omutsha oweqembu lesizwe elama Warriors, uZdravko Logarusic uzathuthukisa umdlalo wenguqu eZimbabwe.
Inhlanganiso ye Zifa ilobelane isivumelwano somsebenzi eseminyaka emibili lomqeqetshi omutsha oweqembu elimela ilizwe le Zimbabwe uLogarusic. Umkhokheli weZifa, uKamambo utshele intathelizindaba zemidlalo ukuba lumqeqetshi uzaqala umsebenzi ngemva kwamaviki amabili.
ULogarusic uzothatha isikhundla esatshiywa nguSunday Chidzambwa ngemva kokuba iqembu lama Warriors liyangise kakhulu kumncintiswano wokudinga intshantshu zezwekazi lase Africa owe Africa Cup of Nations nyakenye.
UKamambo uthe bavumelane lalumqeqetshi ukuba uza kwele Zimbabwe ukuzophakamisa umdlalo wenguqu ngokukhokhela leliqembu ukuba lifinyelele kumncintiswano eyezinga laphezulu.
“Isivumelwano somsebenzi ngeseminyaka emibili kodwa silakho ukusingezelela leso sikhathi nxa lumqeqetshi engafeza izithembiso zakhe ezigoqela ukuba sifinyelele ukuyadlala kumidlalo ye Afcon elandelayo kanye lokuthi sifinyelele ukuyadlala kumidlalo yezizwe zomhlaba okuyabe kungokwakuqala kumbali yelizwe le Zimbabwe,” kutsho uKamambo.
Obephethe isikhundla sikamqeqetshi weqembu lama Warriors uJoey Antipas kanye lobengumsekeli wakhe uLloyd Chitembwe, yibo abakhethwe ukuba ngabasekeli baka Logarusic ndawonye lo Tonderayi Ndiraya, yena ongumqeqetshi weqembu lesizwe elamajaha aleminyaka engaphansi kwamatshumi amabili lantathu.
Umsebenzi wokuba ngumqeqetshi wabonozinti uphiwe owake waba ngunozinti wamaqembu abalisa ele Zimbabwe Saints kanye lele Highlanders uPernell Mckop yena olesikolo esokufundisa onozinti abasacathulayo elizweni le South Africa aphinde njalo abe ngumqeqetshi wabonozinti kuqembu le Stellenbosch lona elidlala kusigaba se ABSA Premiership.
ULogarusic, oyisizalwane sase Croatia, akaqali ukuqeqetsha kuzwekazi lase Africa. Eminyakeni emibili eyedluleyo ubengumqeqetshi weqembu le Sudan njalo ngomnyaka ka 2018 ukhokhele lelolizwe laphutsha lisendaweni yesithathu kumncintiswano we Chan oqhutshelwe kwele Morroco.
Phambilini kwalokho lumqeqetshi usebenze lamaqembu ambalwa emazweni ase east, central kanye le west Africa.
Umdlalo olandelayo oweqembu lama Warriors ukhona mhla zingamatshumi amabili lantathu kunyanga ka Mbimbitho lapho iqembu le Zimbabwe elizadibana khona kabili lele Algeria emidlalweni eyesibaya sika Group H kumncintiswano wokudinga amaqembu azakuyadlala emidlalweni eyokudinga intshantshu zezwekazi lase Africa.
Ngenyanga ka Mabasa uLogarusic labanye bakhe bazakhokhela ilizwe le Zimbabwe kumidlalo ye Chan yona ezaqhutshelwa elizweni lase Cameroon.
