Izakhamizi zesigabeni seZibalongwe eTsholotsho ziphakathi komsebenzi omkhulu wokuzakhela isikolo seSecondary kulesi sigaba kanti manje sezicela usizo njengoba abantwana sebeqalile ukufunda kodwa kusasekunengi okufunakalayo.
Zizitshayela izandla izakhamizi zeZibalongwe eTsholotsho kulandela ukuqala ukwakhiwa kwezindlu zokufundela esikolo esitsha seZibalongwe Secondary kule indawo. Izakhamizi ziqale loluhlelo ngozibandlela ka2017.
Ngemva kweminyaka elikhulu isikolo se Zibalongwe Primary School sakhiwe imizamo yokuthi kube le Secondary ebelethwe yilesi sikolo ibilokhe isehlula.
Lokhu bekubangela ukuthi abantwana abaqeda uGrade 7 kulindawo yeZibalongwe bahambe imimango emide kakhulu besiya ezikolo ezinjenge Skente le Nemani Secondary okungumango owedlula amakhilomitha alitshumi.
Isakhamuzi seZibalongwe, osebenza kweleSouth Africa kanti nguye njalo unobhala wohlelo lokwakhiwa kwalesi sikolo umnumnzana Artwell Ngwenya, uthi baqale ukwakha isikolo lesi ngoba inengi belivele lihle liphelele kuGrade 7 ikakhulu amantombazana njengoba bekusiba yingozi enkulu kibo ukuhamba imimango emide kangaka.
“Abanye bahamba isikhathi eside kakhulu. Uthole ukuthi umntwana ma esefika esikolweni akasakwazi ukuconcentrator emabhukwini akhe. Usengumuntu okhatheleyo. UMiss noma efundisa loba utitsha efundisa akasakwazi ukuconcentrator kulezo zinto. Sicela mpela lo government aluba angasingenelela mpela kule i project yethu isebenze isheshe iphele.”
Ngakwelinye icele isakhamizi sakule indawo umnumnzana Lameck Ncube uthi konke osekwenziwe khathesi, konke kwavela kuzo izakhamizi. Ngo 2017 izakhamizi zakulendawo ziqoqe imali ephezu kwezinkulungwane ezingamatshumi ayisithupha amadola. Umnumnzana Ncube uthi yizo futhi ebezitshaya izitina kantike ziyatshintshana ukuyasebenza mahala kulesi sikolo.
“Ngikhuluma okwamanje sithengile immaterial. Sesenze i slab ese classroom block. Esesingakho okwamanje yikuthi kuphakame umduli. Ma kuqeda ukuphakama umduli sesikhangelele ukuthi sithole usizo kuma donors ukuthi basincedise ukubana sithole iroofing ngoba okwamanje sacela amablock ayitwo ePrimary.”
UNcube uthi ukubhaciswa kwabantwana beZibalongwe Secondary ePrimary sekudale uhlupho lokuminyana okhululu.
“Next year besikhangelele ukuthi khona uForm 3 lo Form 4 baphume baye ngase secondary yikho besilesicelo sokuthi amadonors siwathole, basincedise ukubana sifake i roofing, namatoilet, le teachers’ cottage. Yizo into ebesicela ukuthi sizithole ngokuphangisa. Siyakhalaza ukuthi khona umphakathi wakithi osizwayo kumbe ongizwayo basemukele basilekelele.”
Okwakhathesi lezi zifundi lapho ezibhace khona e Primary zifunda zihlezi phansi akulazitulo lamatebuli okweneleyo. Abanye bafunda bengala ma uniform ngoba abazali bengelayo imali yokuwathenga. Izingwalo zokubhalela, ezokubala lezinto zokubhala ngokunye abakudinga kakhulu abafundi bakulesi sikolo.
Okwamanje izakhamizi zale indawo eziseSouth Africa zikhipha ama R50 ngenyanga kodwa limali ayifiki ndawo.
