amalinks wokungena

Breaking News

IZIFA Imisa Umsebenzi Okwesikhatsshana uNobhala Jikelele wePSL uKenny Ndebele Lomkhokheli weBosso Lowe Dembare


Kennedy Ndebele

Inhlanganiso ebona ngokuqhutshwa komdlalo wenguqu elizweni eyeZimbabwe Football Association (ZIFA) ibikwa isimise ezinye inkokheli zomdlalo wenguqu elizweni ukuphatheka emdlalweni wenguqu zisetheswa icala lokubangela ingxabangxoza emdlalweni lowo.

Usuphenduke waba yinsindabaphenduli umbango wokukhokhela umdlalo wenguqu eZimbabwe njengoba inkokheli yenhlanganiso elawula umdlalo wenguqu kuleli eyeZimbabwe Football Association isithethe inyathelo elokuxotsha labo abaqoqe umhlangano obekumele ube khona ngempelaviki eyedluleyo kodwa wasusedluliselwa phambili ngemva kokungenela kwenhlanganiso yeFederation of International Football Association.

UKhotso Nare, umnikazi weqembu labasakhulayo elidlala lisedolobheni lakoBulawayo eleGolden White, uthi ukuxabana okukhona emdlalweni webhola kuzaphazamisa kakhulu ingqubela phambili yomdlalo kwele Zimbabwe.

“Ingxabangxoza yengxabano leyi ephakathi eZIFA isibulele umdlalo wenguqu. Indlovu ezimbili zingadibana kufa utshani. Okutsho ukuba ngezinye indlela akusela bhola elizadlalwa kuhle ngoba isingene laphakathi enkundleni ngoba abaqeqetshi labo bazatholakala sebesekela olunye uhlangothi labanye besekela olunye uhlangothi.”

Ababikwa sebemiswe ukuphatheka kwezomdlalo wenguqu ngababalisa isiphathamandla senhlanganiso yePremier Soccer League, uKenny Ndebele, isikhulumeli senhlanganiso yeZIFA uXolisani Gwesela, umqondisi weqembu labesilisa elimela ilizwe uWellington Mpandare, abagcinisihlalo bamaqembu amakhulu elizweni uJohnfat Sibanda oweqembu le Highlanders lo Isaiah Mpfurutsa oweqembu leDynamos kanye lamakhansila angamatshumi amabili lesikhombisa aphatheke kumizamo eyokuqhuba umhlangano we exraordinary general meeting.

Intathelizindaba yezemidlalo uNash Mkokwayarira uthi kuyamangalisa ukuba ukumiswa kwabantu ukuphatheka emdlalweni wenguqu sekuyinto yamihla yonke.

“Kusuka kumangalise ngenxa yokuthi bonalabo abamisa abanye umsebenzi labo bamiswa ngenxa yezizatho ezithize ezimgceke.

Ngokubona kwami kukhanya kuledlelo elihle kuZIFA njalo labo abavele bekhona abafuni kuphuma njalo ngokubona kwami ngabantu abalutshwane nje abafuna ukuba bebambe isizwe sonke santando.”

Amalunga ebhodi yeZIFA kukhanya ethole igunya ekutheni inhlanganiso yeFIFA ilaye ukuba amakhansila abefuna ukuqhuba umhlangano wokulungisa okuhluphayo ebholeni lase Zimbabwe adedele yona ibhodi kube yiyo ekhokhela lolo hlelo okumele luqhutshwe kungakedluli mhla zintathu kunyanga kaMabasa.

Yona ibhodi yeZIFA ekhokhelwa ngu Felton Kamambo layo nyakenye imiswe umsebenzi yinhlanganiso elawula ezemidlalo elizweni jikelele eye Sport and Recreation Commission njalo izisebenzi zeZIFA yizo ebeziqhuba umsebenzi zikhokhelwa nguGwesela.

Inhlanganiso yeSRC imise ibhodi yeZIFA iyiyethesa umlandu wokwehluleka ukuqhuba ngemfanelo umdlalo wenguqu okugoqela ukungavikeli onompembe besifazane ekuhlukumezweni zinkokheli kanye lokungaphathi kuhle imali.

Facebook Forum

XS
SM
MD
LG