Abenhlanganiso yabafundi bemakolitshini eyeZimbabwe National Students Union (ZINASU), bakhala ngokuthi lokhe liqonga inani labagqiba izifundo emakolitshini abangatholi imisebenzi.
IZINASU ithi amantombazana emakolitshini abhekane lodubo lokubanjwa ngamandla ukuthengisa imzimba kubabalisi ukuze bathole ukuphumelela ezifundweni kuthi lalapho sebegqibe izifundo bazithola sebephila ngokuthengisa amacansi eweteleni yeManor koBulawayo.
Umkhokheli weZINASU uAllistair Pfunye uthi iyazwisa usizi impilo ephilwa ngabafundi ikakhulu amantombazana asebebanjwa ngamandla ukuthengisa imizimba ukuze baphumelele ezifundweni zabo .
UPfunye wengeze esithi okungaphathisa ukulungisisa umumo oqhubeka usiba mubi elizweni yikusuka embusweni kukaMongameli Robert Mugabe lohulumende wakhe.
Uthe olwamanje abazali kabalamsebenzi, amankampani avaliwe kuthi amantombazana asethengisa imzimba emabhawa ukuze bathole umsebenzi.
Omunye osakhulayo wakoBulawayo, uNkululeko Mabhena, uthe uthole isicoco sakhe ngenyanga eyedluleyo ekolitshini leUniversity of Zimbabwe kodwa akaboni ewuthola umsebenzi masinya ngakho-ke usephila ngokuthengisa okubizwa ngokuthi yi air time.
EZimbabwe inengi lamankampani ikakhulu koBulawayo ayavalwa okwenza ukuthi izisebenzi zinganikwa iholo.