amalinks wokungena

Breaking News

Zindala Zombili Phakath kweHighlanders leDynamos ngeSonto


Zonke indlela ziqonda enkundleni ye Barbourfields koBulawayo ngeSonto, lapho okuzadibana khona inkunzi zomdlalo wenguqu iqembu leHighlanders kanye lele Dynamos emdlalweni weviki lamatshumi amabili kumidlalo yalonyaka eyeCastle Lager Premier Soccer League.

Iqembu le Highlanders lizemukela ele Dynamos ngeSonto emdlalweni okhangelelwe ngabalandeli bomdlalo wenguqu abanengi loba nje lawa maqembu womabili edonsa nzima kumidlalo yalonyaka.

Isimo kasikho sihle kuqembu le Highlanders njengoba lihlezi endaweni yesine nxa usuka emsileni wengalane lilemiklomelo elitshumi lanye ngemva kokuba selidlale imidlalo elitshumi lanye njalo.

Phezu kwalokhu kulehungahunga elithi umqeqetshi weqembu le Highlanders uMadinda Ndlovu ulakho ukutshiya iqembu leli abuyele kwele Botswana lapho abevele esebenza ekhona phambilini kokuphenduka kwakhe kuqembu le Highlanders nyakenye.

Ekhuluma lentathelizindaba zemidlalo ngoLwesine uMadinda uthe akusilo qiniso ukuba usetshiya iqembu le Highlanders njalo lesikhulumeli seqembu leBosso uRonald Moyo uthe yena udaba lolu olukaMadinda alusilo olusemqoka njengoba bebhekane lomdlalo omkhulu ngeSonto.

"Lathi sikuzwa kungamahungahunga njalo asingazake sifune ukuba silokhu sikhuluma ngamahungahunga thina sikhangelane lomdlalo omkhulu onjengowe Dynamos. Thina njengeqembu sizaqhubekela phambili sisebenza njengenjayelo njalo amahungahunga sizawayekela engamahungahunga."

Imidlalo yeviki letshumi lambili eyesigaba se Castle Lager Premier Soccer League izaqala kusasa ngoMgqibelo lapho iqembu le Bulawayo Chiefs elizemukela khona ele FC Platinum enkundleni ye Luveve, iqembu le Chapungu lizadlala lele Yadah ngase Mandava, iqembu le Black Rhinos lizangqikilana lele ZPC Kariba ngase National Sports kuthi iqembu le Harare City lizadibana lele Herentals ngase Rufaro.

Kweminye imidlalo yangeSonto iqembu le CAPS United lizadlala lele TelOne ngase National Sports Stadium, iqembu le Triangle lizemukela ele Chicken Inn ngase Gibbo, iqembu le Mushowani Stars lizadlala lele Hwange ngase Rufaro kuthi iqembu le Manica Diamonds lizadlala lele Ngezi Platinum Stars ngase Vengere.

Kusenjalo inhlanganiso ye Premier Soccer League isiyethule umbiko othi imidlalo yePSL izakuma ukudlalwa kudedelwa imidlalo ye Africa Cup of Nations yona ezaqala ensukwini ezilandelayo elizweni lase Gipite.
Iqembu elimela ilizwe le Zimbabwe emdlalweni wenguqu elaziwa kakhulu ngegama elithi Warriors lalo ngelinye lamaqembu azaphatheka kulimidlalo eyokudinga intshantshu zezwekazi lase Africa.

Sikhangele umdlalo webhola elokuqaga elabesifazane......Iqembu elimela ilizwe le Zimbabwe emdlalweni webhola lokuqaga, owenetball, liqhubekela phambili ngamalungiselelo alo awokuyaphatheka kumidlalo yezizwe zomhlaba ezaqhutshelwa elizweni lase Ngilandi ngenyanga ka Ntulikazi.

Iqembu leli selathola usekelo lwemali oluvela kunhlanganiso ye Nyaradzo njalo kulezinsuku liphezu kwezifundo ezokuba abadlali beziphathe njani nxa sebekhonale phetsheya.

Kulamaqembu amela amazwe alitshumi lesithupha azaphatheka kulumncintiswano njalo lawamazwe ngagoqela ele Ngilandi okuyilo eliqoqa limidlalo, ele Australia, ele South Africa, ele Jamaica, ele Malawi, ele New Zealand, ele Uganda, ele Scotland, ele Northern Ireland, ele Fiji, ele Samoa, ele Trinidad and Tobago, ele Barbados, ele Sri Lanka kanye lele Singapore.

please wait

No media source currently available

0:00 0:02:52 0:00

Facebook Forum

XS
SM
MD
LG