Imuli ezifika ikhulu lamatshumi ayisikhombisa ezadilikelwa yimizi ngenxa yempopoma zamanzi esezihlala eSipepa Flood Victims’ Camp eTsholotsho zithi kazitholi uncedo olufunakalayo kwabakhangelane lezempilakahle.
Zithi kaziphathwa ngemfanelo ngabongi abangabaniki amaphilisi ahambelana lomkhuhlane wesihudo lokuqubuka.
Omunye wabahlulukelweyo, uNkosikazi Sima Sibanda, utshele iStudio 7 ukuthi bayawaswela amaphilisi okwelapha umkhuhlane wesihuqo loqhuqho njalo bayathethiswa okungapheliyo ngomongikazi ababathethisa nsukuzonke besithi babasebenzisa nzima.
Lokhu kusekelwe nguNkosikazi Sibhekaphi Sibanda othe kuswelakala lemithi yokwelapha izilonda esezithwalise nzima abantwana.
UMnu. Desmond Mdluli, obona ngezempilakahle eSipepa Flood Victims’ Camp, uthe umsebenzi wakhe ngowokubona ukuba imikhuhlane ayimemetheki kanye lokubona ukuba kulezambuzi enkambeni.
Uthe akula mikhuhlane esithe yaqhamuka okungaphezu kwamandla abezempilakahle.
Osakhulayo, uElton Madida, uthe loba zinengi indubo abakhekane lazo enkambeni le, okumqoka kuye yizithupha zakhe zemfundo lezokuzalwa kwakhe ezahamba lamanzi.
Izulu liqhubeka lisina eTsholotsho izifuyo labantu sebephila phakathi kwamanzi okungabangela ukuqhamuka kwemikhuhlane ehambelana lamanzi.
Inengi labantu abasenkambeni le bakhala ngokuthi uhulumende ananzelele kakhulu ukuba amaphilisi kanye lokuhlanzeka kuphathwa ngendlela ngoba yebo bahleli kodwa abasuthiseki ngesiphatho.
Inani lemuli ezalahlekelwa yimizi, impahla lezifuyo koSipepa eTsholotsho liya liqansa kulandela ukuna okungapheliyo kwezulu.
