Izizalwane zeZimbabwe ezinengi esezihlala kwamanye amazwe zibikwa zithwele nzima ngokwehluleka ukubhadala izikwelede zezimota lezemabhanga ezama credit cards.
Abanye abakhulume leStudio 7 bathi inengi labo bathethe izikwelede lezi zama credit cards bengelaqiniso lokuthi zihlawulwa njani babe sebezibophela ekubhadaleni imali enengi okumangalisayo.
Bathi kulabanye abatshayela imota ezintsha kodwa abangenelisi ukuzigcina okwesikhathi eside ngenxa yokuthi bayazithathelwa lapho besehluleka ukubhadala izikwelede lezi.
Baphinde njalo bathi okunye okubasindayo yikuthi abenelisi ukuvula amabhizimusi kwele Zimbabwe lalapho abahlala khona ngenxa yokuthi kabakacabangi kahle ngempilo yabo.
UMnu. Dumephi Mema umqondisi weAssociation of Zimbabweans Living Abroad uthi akumelanga izizalwane zeZimbabwe zithathe izikwelede ezinengi ngenxa yokuthi lokhu kulakho ukuzidalela ubunzima okwempilo yabo yonke.
Ukuze sizwe okunengi ngodaba lolu, uGibbs Dube weStudio 7 uxoxe loMnu. Khumbulani Tshuma, isizalwane seZimbabwe esihlala eSydney, Australia.