Inkulumo zokulungisisa okuhluphayo phakathi kweZanu PF leMDC ziqale eCape Town, kweleSouth Africa ngoLwesine.
Umkhokheli welinye lamacele eMDC, eyinhloko kahulumende womanyano, uMnu Morgan Tsvangirai utshele intathelizindaba eseSouth Africa ukuba ufuna kucandwe indlela ecacileyo ezakwenza ukuthi ukhetho oluzayo luqhutshwe ngendlela ezasuthisa bonke abancintisayo.
UTsvangirai utshayele njalo uMongameli Jacob Zuma weleSouth Africa ihlombe esithi wenelise ukuvimba uMongameli Robert Mugabe ukuthi eqhube ukhetho lonyaka.
ECape Town uTsvangirai ulande umhlangano weWorld Economic Forum oqale ngoLwesithathu. Ubikwa elakho ukuhlangana loMongameli Zuma.
Abamela ibandla leZanu PF lamacele womabili eMDC bahlangane lequla lika Zuma eCape Town behlafuna udaba lomhlahlandlela wokhetho kanye lodaba lokugcwalisiswa kwesivumelwano seGlobal Political Agreement.
Ukuhlaziya udaba lolu sixhume ingcwethi ecubungula ezombusazwe uMnu Nkululeko Sibanda lesikhulumeli seMDC ekhokhelwa nguMnu Welshman Ncube uMnu Nhlanhla Dube.
