AbeConfederation of African Football (CAF) babikwa bezaqala bathumele abazohlola ukuthi inkundla ye Barbourfields kanye leye National Sports Stadium sezikusimo bani mhla zilitshumi lanhlanu kunyanga kaNhlangula kodwa isinqumo esokuba lezinkundla sekungadlalelwa yini kuzo sizathathwa mhla zingamatshumi amabili ngoNtulikazi.
Ilizwe le Zimbabwe lizithole selingasela nkundla ezingasetshenziswa ukudlalelwa imidlalo egoqela iqembu lama Warriors ngemva kokuba inhlanganiso ye CAF ithe inkundla zakuleli azikulungelanga ukudlalela imidlalo yezinga laphezulu.
Intathelizindaba yezemidlalo uNash Mkokwayarira uthi wesabela ukuba imizamo eyokulungisiswa kwenkundla ye Barbourfields kanye leye National Sports Stadium izaphazamiswa yikuqhamuka komkhuhlane we Covid 19.
“Ngenxa yokuqhamuka komkhuhlane we Corona Virus indingeko ezinengi seziqondane lalumkhuhlane. Lokhu ngibona angathi kuzaphazamisa inhlelo zokulungisisa inkundla zomdlalo wenguqu ngoba wonke amehlo esekhangele wona lumkhuhlane,” kutsho uMkokwayarira.
Kungaqhamukanga umkhuhlane we Covid 19 aluba iqembu lama Warriors lidlalela imidlalo yalo okumele liyidlale lisekhaya kwamanye amazwe ngoba inhlanganiso ye CAF ithe isimo senkundla zakuleli asikho sihle.
Inkundla ye Barbourfields yiyo ebisesimeni esingcono njalo ike yasentshenziswa ukudlalela imidlalo egoqela amaqembu abasakhulayo kodwa inhlanganiso ye CAF ithe kumele ithuthukuswe ukuze ivunyelwe ukudlalelwa imidlalo yeqembu lama Warriors.
Umlandeli weqembu lama Warriors uBongani Zoza uthi ukulungisa inkundla ye Barbourfields kufana nje lokugambela phezu kwesinye isigamba.
“Iqiniso elikhona yikuba inkundla ye Barbourfields ayingeke ipasiswe ukuba idlalelwe imidlalo yama Warriors ngenxa yokuba kuyabe sekumele kudilizwe izakhiwo zibe seziqheliswa.
Lokhu kungadala ukuba linkundla ibeyingozi kakhulu ngoba yayakhiwa ngesikhathi se Rhodesia.
Ngokubona kwami kuzamele kwakhiwe inkundla ezintsha ezizahle ziyakhiwe ngendlela zakulezinsuku ezizahlala isikhathi eside zingakadingi ukulungisiswa,” kutsho uZoza.
Iqembu le Zimbabwe likusibaya sika Group G kumkhankaso owokudinga amaqembu azakuyaphatheka kumncintiswano wezizwe zomhlaba ozaqhutshelwa kwele Qatar ngomnyaka ka 2022.
Imidlalo eyomncintiswano wezizwe zomhlaba ikhangelelwe ukuqala ngenyanga ka Mfumfu.
Kumncintiswano wokudinga intshantshu zezwekazi lase Africa iqembu le Zimbabwe likusibaya sika Group H ndawonye le Algeria, Zambia kanye le Botswana.
Ngenyanga edlulileyo bekumele iqembu le Zimbabwe lidlale lele Algeria kodwa limidlalo idluliselwe phambili ngemva kokuqhamuka komkhuhlane we Covid 19.
Iqembu le Zimbabwe bekuzamele lidlale umdlalo walo obekumele liwudlale lingekhaya kwelinye lamazwe angomakhelwane ngenxa yesimo senkundla zakuleli esingalunganga.
Inhlanganiso ye FIFA ixhwayise ukuba lemidlalo okumele idlalwe ngenyanga kaNhlangula lapho iqembu le Zimbabwe obekumele livakatshele khona ele Botswana layo idluliselwe phambili.
Omunye umdlalo iqembu le Zimbabwe okumele liwudlale lingekhaya ngokumele liwudlale leqembu lakwele Zambia ngenyanga ka Mfumfu.
Inkinga ekhangelene leqembu le Zimbabwe nxa ilizwe lingehluleka ukulungisisa inkundla kusaselesikhathi yikuba kumele lidlale lamazwe angomakhelwane kumncintiswano we Afcon kanye lowe World Cup okuyiwo futhi okumele lidinge kuwo inkundla zokudlalela.