WASHINGTON DC - Umsakazo weAl Jazeera ngoLwesine wethule ihlandla lesibili lefilimu yawo echaya imisebenzi yenkohlakalo othi yenziwa yiziphathamandla zikahulumende weZimbabwe lezigilamkhuba ezilobudlelwano loMongameli Emmerson Mnangagwa ekuthengisweni kwegolide.
Kuhlandla leli, elilesihloko esithi Gold Mafia: Smoke and Mirrors, uMnu Rikki Doolan, yena osebenza lesikhonzi sikaMnangagwa uMnu Uebert Angela, utshela intathelizindaba zeAl Jazeera ukuthi uyenelisa ukuzincedisa ukungenisa imali efika kuzigidi lezigidi eZimbabwe etholwe ngendlela ezingekho emthethweni, i-money laundering, ziyeyisebenzisa ukuthenga igolide zibe sezisiyalithengisa eDubai.
Kulifilimu uDoolan uyatsho njengoAngel kufilimu yakuqala ukuthi kuyo yonke inkohlakalo le, uMnangagwa uyabe esazi konke okwenzakalayo; ngokunjalo akulalutho olubi olungenzeka kubo.
Kulesiphathamandla njalo sogatsha lweCivil Aviation Authority of Zimbabwe ezisebenzela eRobert Mugabe International Airport esiphuma sichasisa ukuthi bancedisa njani izigilamkhuba ukuphuma legolidi eZimbabwe ngendizamtshina ngaphandle komthetho.
Iziphathamandla zogatsha lukahulumende olubona ngokuthengiswa kwegolide olweFidelity Pinters and Refiners lazo ziyathinteka kuloludaba.
Ihlandla lanamuhla liza ngesikhathi isikhulumeli sikaMnangagwa uMnu George Charamba ethule amazwi okwethusela intathelizindaba izolo esithi zizabotshwa zingaqhubeka zikhuluma ngaloludaba njalo zikhuluma ukuthi uMnangagwa uyathinteka kuloludaba.
Ohlaziya ezombusazwe uMnu Mbuso Fuzwayo, yena okhokhela inhlanganiso yeIbhetshu Likazulu, utshele iStudio 7 ukuthi konke okuvezwa ngumsakazo weAl Jazeer lokhu kuyethusa kodwa akumangalisi ngoba yinto evele isazakala ukuthi igolide liyatshontshwa eZimbabwe.
Your browser doesn’t support HTML5
Ingxoxo loMnu Mbuso Fuzwayo
Imizamo yokukhulumisana leziphathamandla zikahulumende ezigoqela umphathintambo obona ngokwethulwa kwemibiko uNkosikazi Monica Mutsvangwa loMnu Nick Mangwana yehlule ngoba bebengadobhi incingo zabo njalo bengaphenduli imibuzo.
UCharamba yena uphendule umbuzo esimthumele wona ngokweyisa okukhulu.