Kubotshwe amalunga enhlanganiso yamakhosikazi iWOZA ayisikhombisa lamuhla ko Bulawayo abetshengisela esola ukungabi yingxenye yabakhulumisana lomongameli Thabo Mbeki weleSouth Africa ngengxabangxoza eselizweni.
Amalunga la abotshiweyo agoqela iziphathamandla uNkosikazi Jenni Williams lonkosazana Magodonga Mahlangu. IWOZA ithi kumele layo iphatheke kulezi nkulumo, hatshi amacele e MDC le Zanu PF kuphela, ngoba abezombangazwe bengelandaba lenhlupho ezikhathaza umuntu makhaza.
Ilunga le WOZA, uNkosazana Nolwandle Simunyu, obephakathi kwalokhu kutshengisela uchasisele uSithandekile Mhlanga weStudio 7 okwenzakeleyo. Kunjalo nje, igqwetha elimela amalunga e woza abotshiweyo, uMnumzana Kossam Ncube utshele uSithandekile Mhlanga weStudio 7 ukuthi useke wakhuluma lazo izibotshwa njalo ulwisa ukuthi ziye emthethwandaba kusasa.