Ukuvuma kukaMongameli Robert mugabe ukuthi ilizwe libhekane lokusilela kokudla lendlala embi ngesikhathi kulungiselelwa ukhetho kungenza abantu abanengi bengavoteli ibandla le ZANU PF , kutsho ingcwethi ezicubungula ezombusazwe, lengcwethi kwezokulima.
UMongameli Mugabe ukhulume lamazwi emhlanganweni labasekeli bebandla lakhe esigabeni se Plumtree ngempelaSonto. Abamabandla aphikisayo bethesa i ZANU PF ngokuhuga uzulu ukuthi avotele lelibandla ngokumnika ukudla, lokubizela imihlangano lisebenzisa ukudla.
U Brenda Moyo WeStudio 7 ukhulume loMnumzana Edward Mkhosi omela isigaba seMangwe edaleni lepalamende, njalo elilunga lekhomidi yezokulima kulelidale, oqala ngokuchasisa isimo sendlala elizweni.