Umthethwandaba weHigh Court lamuhla walile ukubamba ngamandla ugatsha olubona ngokuqhutshwa kokhetho, olweZimbabwe Electoral Commission (ZEC) ukuthi lwethule impumela yokhetho lukamongameli ngesiphangiphangi.
Loludaba lwakhwezwa emthethwandaba libandla leMDC elikhokhelwa nguMnu Morgan Tsvangirai ngemva kokuba iZEC yehluleke ukwethula limpumela yokhetho uMnu Tsvangirai athi wanqoba umongameli Mugabe. Yena uMnu Mugabe uthi izisebenzi zeZEC zaqilibezela emizameni yokuncedisa iMDC ukuthi inqobe , ngalokhu impumela yalolukhetho izethulwa kungahlolisiswa ukuthi kwahamba njani.
Umsekeli kamphathintambo wezokuqhutshwa kwembiko, uMnu Bright Matonga utshele intathelizindaba lamuhla eHarare ukuthi bayemukela lesisinqumo ngoba sizabapha isikhathi sokucubungula loludaba.
uChris Gande weStudio 7 uxoxe lentathelizindaba yethu uThomas Chiripasi obesemthethwandaba othi iziphathamandla zeMDC zithi zilokudana okukhulu ngalesisinqumo.
Ngakolunye uhlangothi, icele likaTsvangirai lamuhla lazise intathelizindaba ngemva kokwethulwa kwesinqumo lesi ukuthu zikhuthaza uzulu weZimbabwe ukuthi kusukusela kusasa engayi emsebenzini, kuyindlela yokutshengisela ukukhonona phezu kodaba lokungaziswa kwempumela yokhetho. Ukutshengisela ngokungayi emsebenzini lokhu, kutsho iMDC, kuzaqhubeka andubana impumela yaziswe.
Umsekeli kaTsvangirai, uNkosazana Thokozani Khuphe uthe ulethemba lokuthi umanyano weSADC uzangenela ulungisise loludaba. UChris Gande weStudio 7 uxoxe lomgchinisihlalo wabatsha kubandla leli, uMnu. Thamsanqa Mahlangu okhuthaza uzulu ukuthi engayi emsebenzini ngobunengi.
Kunjalo-nje, ingcwethi ecubungula ezombusazwe, uMnu. Bekithemba Mhlanga, utshele uSithandekile Mhlanga we Studio 7 ukuthi ukuphuza kokwethulwa kwempumela kuzakwenza uhulumende weZanu PF eqilibezele kulolukhetho.