Umthethwandaba weHigh Court lamuhla ulahle isicelo secele leMDC elikhokhelwa nguMnu. Morgan Tsvangirai sokuthi umthethwandaba uvikele ukuthi amavoti okhetho olumanyanisiweyo engabalwa kutsha kuzigaba ezingamatshumi amabili lantathu lapho IZANU PF eyanqotshwa khona.
Lesi sinqumo sitsho ukuthi ukubala kutsha kwamavoti lokhu kuzenziwa kusasa. Umahluli uJustice Antonio Guvava uthi udaba lolu alulasisindo yikho elulahlele khatshana.
Lamhlanje kulilanga lokuthola uzibuse, inengi litholakale liqhuba nje imisebenzi yalo lelilanga lingaqakathekiswa. Ilanga leli lifike kulokufuthelana elizweni okwadalwa yikungethulwa kwempumela yokhetho lokudinga umongameli ngemva kwamaviki amathathu lolukhetho lwenziwa. UMasautso Banda uyasipha loludaba ekoBulawayo...
Kunjalo-nje, umongameli Robert Mugabe uthi amabandla aphikisayo kuleli ayasetshenjiswa ngabamhlophe abafuna ukutshontsha uzibuse kuleli njengenjongo yokubuyisela ilizwe kumbuso wabahuquluzi.
Intathelizindaba yethu u Mark Peter Nthambe usethulela lolu daba eseHarare. Kunjalo-nje, uMnu. Busani Ncube, ingcwethi ecubungula ezombusazwe, utshele uSithandekile Mhlanga we studio 7 ukuthi amazwi ka Mugabe akhomba ukuthi uzimisele ukuqhubeka ebusa loba engabe enqotshiwe kukhetho.