Udlakela lokhu luqhubekela phambili ezigabeni ezitshiyeneyo zelizwe njalo inengi labantu libikwa lokhe lilimala lokubalekela imizi ngenxa yaloludlakela.
Abasekeli beZANU PF abangaba likhulu sebezingenele enkomponi yezindlu ze nkampani yezencingo i Tel One bayenza inkamba lapho abasuka khona bengena indlu ngendlu emalokitshini betshela uzulu ukuthi kuzavuka impi enzima uma engavotela uMnu. Morgan Tsvangirai we MDC kukhetho lukamongameli oluzaphindwa. UThabang Mathebula usethulela lolu daba.
Edabeni oluhambelanayo, uMnu. Siyabonga Malandu Ncube, osanda kukhethwa ukumela isigaba se Insiza South edale lephalamende, ekucele le MDC elikhohelwa nguMnu Arthur Mutambara, utshele uSithandekile Mhlanga we studio 7 ukuthi kuleziphathamandla zebandla lakhe ezibalekileyo lamuhla esigabeni sakhe ngenxa yokwethuselwa ngokubulawa ngabalwa impi yenkululeko.
Kunjalo-nje, Inhlanganiso elwela ilungelo lamatitshala, iProgressive Teachers’ Union ithi iphkathi kokubuthanisa ubufakazi bokusa emthwendaba ukuthi uvale inkamba zabasekeli beZANU PF ezikolo. Unobhala jikelele walinhlanganiso uMnu. Raymond Majongwe utshele istudio seven ukuthi kulezikolo ezedlula amakhulu amane esezavalwayo ngenxa yodlakela lwezombangazwe oluqhamuke ngemva kokhetho lukaMbimbitho. UMajongwe uthi amatitshala adlula inkulugwane ezilitshumi asabaleka ezikolo etshiya abantwana abedlula inkulungwane eezingamakhula amabili bengela matitshala. UMajongwe uthi bafuna ukuthi umthethwandaba ubambe ngamandla usikomitshi wamapholisa, uAugustine Chihuru, ukuthi adilize lezinkamba.
Isiphathamandla sePTUZ koBulwayo, uMnu Enock Paradzayi utshele uChris Gande westudio seven ukuthi umumo ulokhu uqhubeka usiba mubi ezikolo.