Amasotsha lamapholisa lamuhla alile ukuthi kulodlakela elizweni. Ekhuluma emhlanganweni obuqoqwe yikhomisheni ebona ngokuqutshwa kokhetho elizweni, iZEC, owokuzama ukuletha ukuthula phambilini kokhetho lwerun-off inkokheli yamapholisa lamasotsha le ithi ngabe kulodlakela elizweni ngabe seyaluqeda.
Kodwa inhlanganiso yeZimbabwe Peace Project yona yethule umbiko othi udlakela oluselizweni alukaze lubonakale sekulokhu ilizwe lathola uzibuse. Linhlanganiso ithi inani lezehlakelo zodlakela luqanse lwafika kunkulungwane ezine, 4 359 ngenyanga kaMabasa kuphela. Limbiko iza ibandla leMDC lisithi lamuhla abasakhulayo bebandla leZanu PF abedlula amakhulu amathathu balethwe emangweni wako Kodzwa lapho abatshaye khona izakhamizi kuyikuphindisela ukutshaywa okwenziwa amalunga ebandla elibusayo kuviki edluleyo. Kusigaba sonesi izolo kubotshwe abasekeli beMDC abayisikhombisa besetheswa icala lokwenza udlakela.
Esigabeni seManicaland isikhulumi sebandla leMDC uMnu. Pishayi Muchauraya utshele iStudio 7 ukuthi kulelunga lebandla lakhe elibotshiweyo ngemva kokuya emapholiseni ukuyabika udaba lodlakela. Amapholisa abikwa engena ezindlini zabantu edolobheni leMutare edinga amalunga eMDC. Esigabeni seMzingwane eMatabeleland South kubikwa abasekeli bebandla leZanu PF bethumbe isiphathamandla seMDC basisa enkambeni yazo.
Omela lumango edaleni lephalamende engowecele leMDC elikhokhela nguMnu. Arthur Mutambara, uNkosazana Nomalanga Khumalo, utshele uChris Gande weStudio 7 okunengi ngaloludaba.