Umhlangano weAfrican Union obuqhutshelwa kwele Egypt uphele lamuhla inkokheli yamazwe ezwekazi leAfrica idabukene phakathi ekuthini udaba lweZimbabwe lungalungisiswa njani.
IBotswana ibikwa ikhuthaze iAU kanye leSadc ukuthi zingaze zamukela umongameli Mugabe kweminye imihlangano yazo ngoba engakhethwanga ngokuqondileyo ukuba ngumongameli weZimbabwe. Amazwe athi iGhana, Sierra Leon, Liberia leSenegal abikwa esole kakhulu uMugabe esithi i AU kumele imthathele amanyathelo aqinileyo nxa engafuni ukwenza ukhetho olutsha.
Kodwa akhona amazwe afana leAngola abikwa esithi iMDC leZanu PF kumele zibumbe uhulumende womanyano kubunjwe isikhundla senhloko kahulumende esizathathwa nguMugabe kumbe uMnu Morgan Tsvangirai nxa sokwabelanwa umbuso, okuyisibonelo esenzakale kweleKenya phakathi komkhokheli webandla eliphikisayo uMnu Raila Odinga lomongameli Mwai Kibaki.
Ekhuluma phezu kodaba lokwabelana umbuso, uMnu George Charamba, oyisikhulumi sikaMugabe uthe umhlaba kumele uthule ngodaba lweZimbabwe, esithi abantu beZimbabwe yibo abazazilungisela inkinga ababhekane lazo. Uthe amazwe afana leBhilithani leMelika, wona asola kakhulu uMugabe, kumele atshiyane loMugabe. Umhlangano weAfrican Union lo ubukhangelelwe ngumhlaba jikelele ukuthi uphume lezinqumo ezizaletha ingqubelaphambili ekuxazululeni inkinga eseZimbabwe.
Kodwa lokhu kukhanya kungasenzakalanga, okutsho ukuthi abantu beZimbabwe sokumele bahlale phansi bebodwa bebone ukuthi udaba lwabo balulungisisa njani, kutsho ingcwethi ecubungula ezombusazwe uMnu Mlamuli Nkomo.