Ibhanga elikhulu lelizwe i Reserve Bank of Zimbabwe lethule imali entsha, i $1000 ebambeneyo ngolweSithathu lengeza njalo inani lemali uzulu asesenelisa ukuyithatha ngelanga emabhanga isuka kumakhulu amahlanu amadollar- $500 isiya kunkulungwane yamadollar-$1000.
IRBZ ithi lokhu kuzakwenza kubelula ukuthi uzulu athole imali, yona esilelayo emabhanga. Inyathelo leli liza kulembiko yokuthi usibalukhulu waleli bhanga uMnumzana Gideon Gono ulakho ukutshiya umsebenzi.
Ingcwethi kwezenotho zithi ukulethwa kwemali entsha lokhu akusoze kuncede uzulu ngoba abamabhizimusi labo bazahle bakhweze intengo yezinto sebehahabela i$1000 entsha le. Eyinye yalezingcwethi, uMnuRejoice Ngwenya utshele uBrenda Moyo ukuthi usibalukhulu webhanga leli uMnumzana Gedion Gono ngabe uyama ukuletha inhlelo ezintsha zemali kuze kubunjwe uhulumende omutsha.