Inkulumo phakathi kwequla leZanu PF lequla leMDC ekhokhelwa nguMnu Morgan Tsvangirai ziqhubekele phambili eHarare lamuhla, zaphela kungelakuvumelana njengayizolo.
Amaqula la ebekhulumisana ngodaba lokwabelana izikhundla zedale lecabinet.
Isikhulumi seMDC kaTsvangirai uMnu Nelson Chamisa utshele iStudio 7 ukuthi inkinga yikuthi iZanu PF ifuna izikhundla zonke ezimqoka zalelidale.
UTsvangirai ngokwakhe ubemele abe lomhlangano lentatheli lamuhla phezu kodaba lwenkulumo kodwa lumhlangano awusabanga khona.
Isiphathamandla seZanu PF uMnu Patrick Chinamasa uthi ibandla leMDC yilo elenza inkulumo lezi zingahambi kuhle ngoba liveza imfihlo kuntathelizindaba.
Kodwa isiphathamandla seMDC kaTsvangirai uMnu Sam Sipepa Nkomo uyakulandula lokhu, esithi abeZanu PF yibo abatshoma bekhuluma into ezingafanelanga kuphephandaba leHerald.
Kusenjalo, ingcwethi ecubungula ezombusazwe uMnu Mlamuli Nkomo utshele uNtungamili Nkomo weStudio 7 ukuthi, osokudingakala yikuthi iSadc ingenele izelamula lumbango.