Umkhuhlane wohudo, iCholera oqhamuke eHarare ngenyanga ezilutshwana ezisanda kwedlula usumemetheke wafika kwamanye amadolobha. ebeitbridge lumkhuhlane ubikwa usubulale abantu abangamatshumi amahlanu kuthi eharare sekufe abedlula amatshumi athoba minwe mibili, enkabazwe wabulala abalitshumi.
Odokotela benhlanganiso ye Doctors for Human Rights bathi ilizwe selisengozini esabekayo ngenxa yomkhuhlane lo njengobalivele libhekane lokusilela kwamanzi.
Kuthi idale lephalamende lakwele South Africa lalo liphathe ngokukhathazeka okukhulu kokuqhamuka kwalumkhuhlane ngoba usucaphe umgcele wabulala abantu kulelo lizwe. Amadolobha wonke elizweni aphakathi kokwacebisa uzulu ngendlela angazivikela ngazo kulumkhuhlane.
Kodwa owake wamela iVictoria Falls Edale lephalamende ngowecele leMDC elikhokhelwa nguMnu. Arthur Mutamabara, uMnu. Thembinkosi Sibindi utshele uChris Gande westudio 7 ukuthi lumkhuhlane
ulakho ukuqhamuka kulelidolobha laloba yisiphi isikhathi ngoba ingcekeza kulelidolobha isesebeka, ikakhulu esibhedlela.
Kusenjalo, dokotela
bona bathi laloba umkhuhlane wecholera lo ungumkhuhlane omubi, ulula kakhulu
okuwuvimba ukumemetheka. ezinye zezibonakaliso zalumkhuhlane yisihudo, ukuphela
amandla emzimbeni, ukuhlanza, uqhuqho kanye lokoma njalo nje.
Ingcwethi zezempilakahle zithi okuqakathekileyo nxa umuntu ehlaselwe yisihudo yikudinga ukubuyisela amanzi umzimba olahlekelwa ngawo nxa umuntu ehuda.
Lawo manzi kodwa akumelanga abe ngamanzi nje, alendlela okumele alungiswe ngawo kuhlanganiswa isawudo letshukela.
Untungamili Nkomo we studio 7 uxoxe lo dokotela Nduduzo Tshili, yena osebenzela kobulawayo wasichasisela ngendlela yokuzelapha eyamanzi, itshukela kanye lesawudo lokuthi kuyabe kumele kuhlanganiswe njani njalo kube yisilinganiso esinganani?
Kunjalo nje, uSithandekile Mhlanga we studio 7 uxoxe lo Mnu. Simon Nyoni, isakhamuzi se Budiriro 5 e Harare, endawonye lo khansila Tambudzayi Ncube kaward 3 e Beitbridge, engowecele le MDC elikhokhelwa nguMnu. Morgan Tsvangirai, ukuze sizwe abazibonele khona ngamehlo abo ezigabeni zabo, lapho okufe khona inengi labantu ngenxa yomkhuhlane we cholera lo.
UNyoni usungule le ingxoxo ngokusichasisela ngesiphithiphithi asibone sisenzakala eklinika ye Budiriro.