Uhulumende uselaye amasotsha lamapholisa elizweni lonke jekelele ukuthi aqaphele
ukungahlaliseki okungaba khona elizweni yiloba nini.
Abazi ngokwenzakala kubutho bathi amasotsha lamapholisa aziswe ngolweSibili yinkokheli yawo ukuthi kumele elimuke njalo ehlale elindele ukulwisana lobudlova bonke obungaba khona elizweni.
Uhulumende kaMongameli Robert Mugabe ubikwa ekhathazekile kakhulu ngokufuthelana okukhona elizweni njalo sedlela evalweni.
Okumethusayo kakhulu kubikwa kuyikuthi amasotsha lawo akhanya sebambana lozulu ekusoleni umbuso wakhe. Amasotsha wona abikwa etshaye kabuhlungu uzulu weChinhoyi obezithengisela lamuhla.
Abenhlanganiso ezilwela ilungelo loluntu, ezifana labo ZCTU, bathi bazaqhubeka betshengisela bekhonona ngomumo oselizweni kungelani lokuthi bayabotshwa.
Sibuze ingcwethi ecubungula ezombusazwe uMnu Mlamuli Nkomo ukuthi ukufuthelana lokhu kulakho na ukuwuwisa ngophondo umbuso kaMugabe?