Laloba inkokheli yeSadc igqibe umhlangano wayo kweleSwaziland ngoMvulo kungela lizwe ngitsho lelilodwa eselivezile ukuthi lizaphathisa uhulumende weZimbabwe ngemalini, uhulumende weSouth Africa uveze ngolweSibili ukuthi uzanikeza iZimbabwe izigidi ezingamakhulu athoba minwe mbili zama rand - R800 million eyokuvuselela umnotho.
Ekhuluma leStudio 7 umqondisi wogatsha oluphathelane lezwekazi leAfrica ebhanga leSouth Africa uMnu Neil Cole uveze ukuthi izigidi ezingamakhulu amathathu zamarand - R300 million zizanikezwa iZimbabwe phakathi kwenyanga ezintathu ezizayo njalo zizaphathisa ukuvuselela umnotho phansi kohlelo lukahulumende olwe Short Term Emergency Program.
UMu Cole uveze njalo ukuthi i R500 million izaphiwa amankampani azimeleyo lakahulumende. Isouth Africa iba lilizwe lakuqala kuSadc ukupha uhulumende weZimbabwe uncedo lwemali yokuvuselela umnotho.
Begqiba umhlangano wabo ngomvulo, abakhokheli beSadc babumbe ikomidi ezacelela iZimbabwe uncedo lwemali emazweni omhlaba njalo ikomidi le izacela amazwe ethulele uhulumende kaMugabe izijeziso ukuthi azesule.