Esinye sezinqumo ezithethwe ngumhlangano we COMESA, ophele lamuhla e Victoria Falls, yikuthi incwadi yokuthi umongameli Omar Al-Beshir we Sudan abotshwe ayethonisiswa kumthethwandaba we International Court of Justice kumele icitshwe ngoba kungayisiyo ndlela yokuletha ukuthula kulelolizwe.
Inengi libona lesisinqumo sizaninda eleZimbabwe, elazakala ngokwephula amalungelo oluntu, ngodaka olufanayo ngesikhathi inhloko kahulumende, uMnu. Morgan Tsvangirai ezama ukuthi akhulumisane lamazwe aphetsheya ngokulungisa ingxabangxoza eselizweni.
UMnu. Welshman Ncube, umphathintambo obona ngezamankampani lokuthengiselana, usichasisela okunengi ngempumela yalumhlangano kungxoxo ayenze lo Sithandekile Mhlanga we studio 7.
Iziphathamandla zikahulumende kanye leze COMESA ebezilondoloza ukuthula kulumhlangano zivimbele intathelizindaba ezingabhalisanga kunhlanganiso ye media information commission, i M-I-C ukuthi zisebenze lanxa umthethwandaba kuviki edluleyo unqume ukuthi intatheli lezi zingazihluphi ngokubhalisa ngoba i MIC ivele ingekho emthethweni.
Inhlanganiso ye Media Institute of Southern Africa, MISA, ithi ilungiselela ukusa uhulumende kanye leCOMESA emthethwandaba ngokungahloniphi isinqumo somthethwandaba.
Isiphathamandla salinhlanganiso uMnu. Njabulo Ncube, uxoxe lo Chris Gande we studio 7 ngaloludaba.