Inhloko kahulumende uMnu Morgan Tsvangirai uqhubekele phambili ngohambo lwakhe emazweni aphetsheya ngoLwesithathu ngokuya kwele France lapho akhangelelwe ukuhlangana lomkhokheli walelo lizwe ngoLwesine.
UTsvangirai usuke kwele Bhilithani lapho ahlangane khona lenhloko kahulumende yalelo lizwe uMnu Gordon Brown ngoMvulo. Injongo yohambo lukaTsvangirai ngeyokuvuselela ubudlelwano lamazwe omhlaba kanye lokucela imali yokuvuselele umnotho welizwe.
Emizameni yokuvuselela ubudlelwano lobu umanyano we European Union usubumbe iqula elizakhulumisana lequla leZimbabwe.
Inkulumo phakathi kwe EU leZimbabwe zizaqala kusikhatshana esizayo kulandela ukukhulumisana phakathi kweziphathamandla zalumanyano lequla likaTsvangirai ngeviki edluleyo eBrussels.
Umphathintambo obona ngezamabhizimusi lokuthengiselana uMnu Welshman Ncube uchasisele lumsakazo okunengi ngemizamo yokuvuselela ubudlelwano phakathi kwe EU leZimbabwe.