Icele leMDC elikhokhelwa nguMnu Morgan Tsvangirai lalile ukuphatheka emhlanganweni wedale lecabinet obizwe ngesiphangiphangi ngoMvulo lisithi uMongameli Robert Mugabe uwubize engazange ekhulumisane loTsvangirai.
Imihlangano yecabinet yenziwa maviki wonke ngoLwesibili, kodwa owayonale iviki uqhutshwe ngoMvulo ngoba uMugabe ezakuba engekho elizweni ngoLwesibili.
Ngomthetho
uMugabe nguye omele akhokhele imihlangano yecabinet, kodwa nxa engekho uTsvangirai njengenhloko kahulumende, nguye omele ayikhokhele.
Ekhuluma lentathelizindaba eHarare ngoMvulo umsekeli kaTsvangirai uNkosazana Thokozani Khupe uthe umhlangano wecabinet lo ubumele uqhubekele phambili ngoLwesibili laloba uMugabe engekho.
UMaKhupe uthe uTsvangirai njengoba ekhona, ubezawukhokhela lumhlangano. Wengeze wathi ukuqhutshwa komhlangano lo ngoMvulo kuveza sobala ukuthi uMugabe uyameyisa uTsvangirai.
Uthe njalo ibandla lakhe lifuna kulungisiswe konke okusele kulenga kusivumelwano sokubumba uhulumende womanyano, esithi kulilungelo laleli bandla njalo ukuthi liphume kuhulumende womanyano lo ngoba iZanu PF iqhubeka isephula izibopho zesivumelwano njalo amalunga ayo ehlukuluzwa.
Laloba abaphathintambo bebandla likaTsvangirai balile ukuphatheka kulumhlangano, abakubandla leZanu PF lecele leMDC elikhokhelwa nguMnu Arthur Mutambara baphathekile.
Ingcwethi ecubungula ezombusazwe uMnu Rejoyce Ngwenya usole kakhulu uMongameli Mugabe esithi uqhubeka ebusa angani ilizwe leZimbabwe yinkampani yakhe.