Abaphathintambo bamabandla akuhulumende womanyano bavumelene emhlanganweni weCabinet ngoLwesibili ukuthi kumele kuguqulwe indlela ibhanga elikhulu lelizwe elisebenza ngayo, bapasa iReserve Bank Reform Bill, yona ekhangelelwe ukwethulwa kudale lephalamende kunsukwana ezizayo.
IBill le ingapaswa ngamadale womabili ephalamende izakuba ngumthetho ozaletha inguquko enkulu kundlela iReserve Bank esebenza ngayo. Usibalukhulu waleli bhanga uMnu Gideon Gono uzaqunyelwa amandla athize phansi kwalumthetho.
I Cabinet ibikhangelelwe ukuthola impendulo kuMongameli Mugabe, uMnu Morgan Tsvangirai loMnu Arthur Mutambara ngoLwesibili phezu kokuthi bazalungisisa nini konke okusele kulenga kusivumelwano sokubumba uhulumende womanyano.
Kodwa akusenzakalanga lokhu ngoba abathathu laba bengasakhulumisananga ngezinto lezi njengalokhu obekukhangelelwe. Abathathu laba bebemele bekhulumisana ngento ezihluphayo kuhulumende wobumbano ngoMvulo, kodwa bacine sebekhulumisana ngobudlwangudlwangu obuqhamuke emhlanganweni wokudinga imbono kazulu phezu kokulotshwa kwesisekelo sombuso esitsha eHarare.
Ngalokho sebekhangelelwe ukuhlangana ngeviki ezayo ngoMvulo, baphe idale leCabinet impendulo ngoLwesibili phezu kokuthi kahle-kahle into ezihluphayo kuhulumende lezi zizalungisiswa nini.
Okunye okukhulunywe kuCabinet ngoLwesibili ludaba lwe Mid Term Fiscal Policy ezakwethulwa ngumphathintambo obona ngezemali uMnu Tendai Biti ngoLwesine, kubika abasiki bebunda.
Ingcwethi ecubungula ezombusazwe, uMnu Mlamuli Nkomo uthi kusalobunzima ekuthini uTsvangirai, uMugabe loMutambara bavumelane kulokho okuhluphayo kuhulumende.