Uhlelo lokukhuthaza ukuxolelana elizweni luqale ngoLwesihlanu eHarare lapho inkokheli yamabandla akuhulumende womanyano emanyane khona ikhuthaza ukuthula.
UMongameli Robert Mugabe utshele umbuthano weziphathamandla zikahulumende labameli bakwamanye amazwe esigodlweni ukuthi kungumlandu wezizalwane zeZimbabwe ukuqeda ukungezwani, esithi usola kakhulu udlakela olulokhu lusaqhubeka elizweni kwezombusazwe.
Le yimbiko egcizelelwe yinhoko kahulumende uMnu Morgan Tsvangirai lomsekeli wakhe uMnu Arthur Mutambara. Kodwa okube sobala yikuthi uMugabe loTsvangirai kabavumelani ekuthini uhlelo lokuxolelana lolu kumele luqhutshwe njani.
UTsvangirai ukhuthaze ukuthi kutshelwane iqiniso mayelana ngodlakela olubekhona elizweni kusukela ngesikhatho sempi yenkululeyo, kusiya kumpi yeGukurahundi kanye lanyakanye lapho okuqhamuke khona udlakela olwesabisayo lukhokhelwa ngabebandla leZanu PF
UTsvangirai ukhuthaze lokuhlawulwa kwalabo abathintwe ludlakela, esithi njalo uzulu kumele ezikhulumele ukuthi ufuna uhlelo lokuxolelana lolu luqhutshwe njani. UMugabe yena kazange ayithinte linkulumo.
Abenhlanganiso ezizimeleyo abanengi basola indlela uhlelo lolu oluqhutshwa ngayo njalo bathi kabasoze baphatheke kilo.bathi abezombusazwe kabamelanga babe yibo abalukhokhelayo ngoba kuyibo njalo abakhokhela kundaba zodlakela.
Uhlelo lolu luphela ngeSonto lapho abezinkonzo abakhangelelwe ukubuthana khona eHarare bekhulekela ukuthula. Ingcwethi ecubungula ezombusazwe uMnu George Mkhwanazi utshele iStudio 7 ukuthi kaboni abeZanu PF bephumela egcekeni mayelana ngamacala abawadalileyo.