Odokotela abasebenza esibhedlela seParerenyatwa, abakhalala umsebenzi okwamaviki amathathu, baxotshwa umsebenzi lugatsha lwezempilakahle ,kodwa bona bathi sebebuyela emsebenzini, baphinde bathola incwadi zokubaxotsha umsebenzi zivela kumqondisi wesibhedlela zokuthi abavunyelwa ukungena emawadini alesisibhedlela kumbe ukufika nje esibhedlela.
Umongameli wenhlanganiso yeHospital Doctors Association uMnumzana Brighton Chizhande utshele iStudio 7 ukuthi lokhu kuyadanisa ngoba ukukhulumisana phakathi kwabodokotela logatsha lwezempilakahle ukuze kulungisiswe izikhalazo zabo kuyaqhubeka.
Umgcinisihlalo wenhlanganiso ye Zimbabwe Doctors for Human Rights udokotela Douglas Gwatidzo utshele iStudio 7 namhla ukuthi kulokuxokozela okunengi kudaba lwabodokotela okokuthi akuselamuntu okwaziyo ukuthi sibi sibili kuyini okwenzakalayo.
Abanye esikhulume labo bathi kukhanya sokungenela ezombusazwe, kulokucabangela ukuthi ingxabangxoza le ingabe ijonge ukuwisa umphathintambo wezempilakahle uMnumzana Henry Madzorera ongowebandla le MDC.
Sixhume ingcwethi kwezombusazwe uMnumzana rejoice Ngwenya laye othi akukacaci ukuthi kuyini okwenzakalayo kudaba lwabodokotela, exwayisa ukutthi odokotela laba kumele baqhubeke bekhulumisana lohulumende kuze kulungisiswe izikhalazo zabo.