Inkokheli yamazwe angezansi kwezwekazi leAfrica eyeSadc igqibe umhlangano wayo omkhulu kwele DRC izolo ngokukhuthaza amazwe afana leMelika leBhilithani ukuthi esule izijeziso azethulele uhulumende kaMongameli Mugabe eminyakeni edluleyo ngoba zisenqabela imvuselelo.
I Sadc ithi uhulumende womanyano kasoze enelise ukuvuselela umnotho njalo alungisise konke okuhluphayo elizweni nxa izijeziso lezi zingesulwanga.
Icele leMDC elikhokhelwa nguMnu Morgan Tsvangirai belihambe emhlanganweni lo likhangelele ukuthi iSadc ihluze ngokugcweleyo ukungavumelani okukhona kuhulumende ikakhulu edabeni lukasibalukhulu webhanga elikhulu lelizwe uMnu Gideon Gono legqwetha likahulumende uMnu Johannes Tomana.
Kodwa inkokheli yeSadc ayisaluhluzanga kabanzi udaba lweZimbabwe ngaphandle nje kokukhuthaza ukusebenzelana kuhle phakathi kweMDC leZanu PF lokukhuthaza ukususwa kwezijeziso.
Ngalokhu icele leMDC elikhokhelwa nguMnu Tsvangirai lithi lidaniswe linyathelo leSadc leli. Iziphathamandla zaleli bandla zizaqhuba umhlangano omkhulu ngempelaviki lihluza okuphume emhlanganweni weSadc lo.
Ngolwesithathu khona uTsvangirai uqhube umhlangano njengenhloko kahulumende lozulu weGwanda wathi ulethemba lokuthi ugatsha lweSadc Troika luzangenela ngokuphangisa kulungisiswe konke okuhluphayo eZimbabwe.
Umsekeli kaMongameli wele South Africa uMnu Kgalema Motlanthe uveze ukuthi iSadc Troika ingehluleka ukuhluza lulungisise okuhluphayo lokhu, iSadc ngokwayo ilakho ukubiza umhlangano opheleleyo oqondane leZimbabwe.
UMnu Tsvangirai uthe laloba
kulokufuthelana okukhulu phakathi kweMDC leZanu PF, ibandla lakhe kalisoze
liphume kuhulumende womanyano.