Umongameli Mugabe lamuhla uthuke abelungu esithi bazibona ungani yibo abamele babuse. UMugabe, ozwakale ingani ubethethisa iqula lomanyano we European union uthe iZimbabwe kayizange inxuse abelungu ukuthi bazofaka impumulo zabo kudaba lweZimbabwe.
Ekhuluma emhlanganweni wentsha yebandla le ZANU PF oqalise eHarare lamuhla uMugabe uthe uhulumende kasoze atshedele emuva kudaba lokwaba kutsha umhlabathi. Lumhlangano ukhangelelwe ukuthi ukhethe inkokheli yekomidi yabatsha eye National Executive Council abaleminyaka engaphansi kwengamatshumi amathathu, njengalokhu okulotshwe kugwalo lwabo lwesisekelo sebandla.
Umabhalane omkhulu wabatsha kulelibandla uMnu. Absalom Sikhosana, ubikwa esithi umhlangano lo ukhangelelwe ukuthi uvumelane ngokusemthetwheni ukuthi ufuna umongameli Robert Mugabe kube nguye ozancintisa ukuba ngumongameli welizwe njalo, kukhetho oluzayo.
Kodwa uMnu. Rejoice Ngwenya, ingcwethi ecubungula ezombusazwe, utshele uSithandekile Mhlanga we studio 7 ukuthi imbiko eyethulwa yimisakazo lamaphephandaba kahulumende, ifuna kukhanye engani ibandla le ZANU PF liyavumelana kuzinqumo elizithathayo khona kungenjalo.