Sokwenele umnyaka ngoLwesibili ibandla leZanu PF lilobelane phansi isivumelwano sokubumba uhulumende womanyano lamacele womabili eMDC.
Amabandla la angene kusivumelwano se Global Political Agreement mhlaka 15 ngoMpandula nyakenye, esiyiso esikhokhelele ekubunjweni kukahulumende womanyano obusayo okwanje.
Kusenela umnyaka nje isivumelwano lesi senziwe, ukufuthelana phakathi kwe MDC leZanu PF kuya phambili, kanti njalo laso isivumelwano lesi kasikagcwaliswa.
I MDC yethesa iZanu PF umlandu wokwephula isivumelwano lesi ngokungafuni ukuguqula imithetho efana lePOSA lokungafuni ukuthi uzulu azilobele isisekelo sombuso esitsha asifunayo.
I MDC ithi njalo iZanu PF kayifuni ukuthi osibalukhulu bayo bezabelo bafungiswe baqale umsebenzi.
Kodwa iZanu PF ithi inhlangothi zombili zeMDC yizo ezephula isivumelwano lesi ngokungafuni ukususa izijeziso ezethulelwa iziphathamandla zayo ngamazwe afana lemelika leBritain.
Kusivumelwano lesi amabandla la avumelana ukuthi izijeziso lezi kumele zisuswe. Kodwa iMDC ithi kayilawo amandla okuzisusa.
Ingcwethi ecubungula ezombusazwe uMnu Mandlenkosi Gatsheni uthi kuyayangisa ukuthi abeMDC labe Zanu PF lokhu bedonselana besehluleka ukugcwalisa izifungo abazenzayo.
Abalaleli beStudio 7 labo bathi kabakaboni inguquko ezwayo laloba sokulomnyaka amabandla akuhulumende lo evumelane ukusebenza ndawonye.