Umphathintambo obona ngokwethulwa kwemibiko uMnumzana Webster Shamu usethule amabizo amalunga ama boards amankampani kahulumende. Amankampani la yi Zimbabwe News papers group ezakhokhelwa ngu Dr Charles Utete, Zimbabwe Broadcasting Holdings ezakhokhelwa nguMnumzana Cuthbert Dube, iZimbabwe Broadcasting Authority ezakhokhelwa nguMnumzana Tafataona Mahoso, iKingston Holdings ezakhokhelwa ngu Dr Millicent Mombeshora, iTransmedia ezakhokhelwa ngu Dr Paul Chimedza, le ZIANA ezakhokhelwa nguNkosikazi Rosemary Mazura. Ama board la alamanye amalunga akubutho kumbe ake aba kubutho okuyinto esolwa kakhulu zinhlanganiso ezimbalwa.
Inhlanganiso lezi zigoqela eyentathelizindaba iZimbabwe Union of Journalists, Zimbabwe Media Alliance le Media Institute of Southern Africa -MISA ethi umphathintambo wezemibiko uMnumzana Shamu ukhethe amalunga amaboards la okufihlekileyo.
Ibandla le MDC elikhokhelwa yinhloko kahulumende uMnumzana Morgan Tsvangirai lalo lisole kakhulu ukukhethwa kwamalunga ama board amankani kahulumende la isithi laba ngabantu abazaqhuba inhlelo zebandla leZANU PF kuphela.
UBrenda Moyo westudio 7 ukhulume lomsekeli wesikhulumi sebandla leli uNkosazana Thabitha Khumalo othi bona bethuswe yikukhethwa kukaMnumzana Tafataona Mahoso ukukhokhela i board ye Brodcasting Authority of Zimbabwe ngoba ephambanise kakhulu ukwethulwa kwemibiko elizweni engumkhokheli we Media and Information Commission eseyasuswa esikhundleni.