Izikolo zivulwa ngolweSibili nje, inkokheli zenhlanganiso ezilwela amalungelo ababalisi zithi zizatshengisela ngendlela ezitshiyeneyo ngenjongo yokubamba uhulumende ngamandla ukuthi engezelele ababalisi iholo.
Bathi lokhu bakwenzela ukuthi izifundo zingaphazamiseki njalo ukukhalala umsebenzi kwanyakenye akuphumelelanga ngoba abanye ababalisi babefundisa befuna ukuthola imali abayibhadalwa ngabantwana kulokuthi bakhalale umsebenzi. UMnu. Enock Paradzai, isiphathamandla se Progressive Teachers’ Union of Zimbabwe, utshele uSithandekile Mhlanga we Studio 7 ukuthi kunengi okumele kwenziwe yisiphathamandla sikahulumende, uMnu. Tendai Biti engaka misi iholo lababalisi.
USithandekile Mhlanga uphinde waxoxa loMnu. Sifiso Ndlovu, isiphathamandla se Zimbabwe Teachers’ Association, yena othi basebenza ndawonye lezinye inhlanganiso zababalisi, ngakho bonke bazahamba ukuyafundisa, ngakwelinye icele bekhulumisana lohulumende.