Owake waba lilunga ledale lephalamende emela umuzi weHighfields,eHarare uMnu. Munyaradzi Gwisai labanye abangamatshumi amane lanhlanu bamiswe phambi komthethwandaba kamantshi ngolweSithathu eHarare besetheswa umlandu lokufuna ukugengqula uhulumende.
Abantu laba, abagoqela izisebenzi labafundi babotshotshwa
emahofisini enhlanganiso ye International Socialist Organization ngoMgqibelo ngemva kokutholakala bebukele imifanekiso yevideo yokutshengisela okwenziwe kwele Egypt. Umtshutshisi, uMnu. Edmore Nyazamba utshele umthethwandaba ukuthi izibotshwa lezi zibe ziqoqa ukususa uMongameli Mugabe embusweni zisithi usehlale kakhulu.
Igqwetha labo, uMnu Alec Muchadehama ucele ukuthi abatshutshisi bamuphe amaphepha alandisa ngecala labo elizaqhubeka lithoniswa ngolweSine. Nxa bengatholakala belecala balakho ukugwetshelwa ukulengiswa.
UChirs Gande weStudio 7 uxoxe lengcwethi ecubungula ezemithetho,
uMnumazana Matshobana Ncube othi kukhanya uhulumende engela bufakazi obuqinileyo.
