Ixuku lenkokheli yecele leMDC elikhokhelwa ngowayengumgcinisihlalo, uMnu. Joubert Mudzumwe selise udaba lokukhethwa kukaMnu. Welshman Ncube labanye kuMongameli Mugabe lenhloko kahulumende, uMnu. Morgan Tsvangirai. UMudzumwe labanye bakhe bathi kumele uMugabe loTsvangirai bangenzi uNcube njengomunye wabasekeli bakaTsvangirai besithi wakhethwa emhlanganweni owawungaphandle kwesisekelo sombuso salelobandla.
Isikhulumeli secele leMDC elikhokhelwa nguNcube, uMnu. Nhlanhla Dube utshele iStudio 7 ukuthi belokhu bemelele ukuthi uMongameli Mugabe agcobe uNcube labanye bakhe abakhethwa ukungena kuhulumende womanyano.
Kunjalo nje, ingcwethi kwezomthetho, uMnu. Job Sibanda utshele iStudio 7 ukuthi imizamo yabo Mudzumwe labanye bakhe yokusa loludaba emthethwandaba ayingeke ibelesithelo.