Amalunga ecele le MDC elikhokhelwa nguMnu. Morgan Tsvangirai ayisikhombisa abotshwe ngoMvulo ngemva kodlakela oluqhamuke eMbare eHarare, akhululwe ngolweSine engahlauliswanga imali yesibambiso eye bail.
Igqwetha labo, uMnu. Jeremia Bhunu utshele iStudio 7 ukuthi bekuvele kungafanelanga ukuthi abotshwe ngoba amapholisa ebathethe esithi ayabavikela hatshi ukubabopha.
Kusenjalo, ikhansili ye Harare ibikwa ibivuliwe ngolweSine kulandela ukuvalwa kwayo ngolweSithathu kusesatshelwa ukuthi abacatshangelwa ukuthi ngabasekeli be ZANU PF bazabangela udlakela.
UKhansila Peter Moyo ka Ward 13 kulelidolobho, utshele uSithandekile Mhlanga we Studio 7 ukuthi ezinye izisebenzi zekhansili zesabile ukuya emsebenzini.
Ukuhlaziya udaba lodlakela lolu uNtungamili Nkomo weStudio 7 uxhume ingcwethi ezicubungula ezombusazwe uMnu Brilliant Mhlanga loMnu Rejoice Ngwenya.