Amapholisa avimbe ibandla le ZAPU ukuthi liqhube umhlangano we rally eTsholotsho Business Centre ngoLweSibili, esithi awasoze athole amalunga esipholisa eneleyo okubona ukuthi umhlangano lo uqhutshwa ngemfanelo.
UMnu. Methuseli Moyo, isikhulumi salelibandla uthi umhlangano lo ubuzaba ngowokuqala omkhulu, kulandela owe Congress owenziwe ngoMpandula odluleyo.
Amapholisa asanda kuvimba lelibandla njalo ukuthi litshengisele lisola ukunanzwa kwelanga le Unity Day, lisithi akukho okunengi okwaguqukayo lokhu kwenziwa lesisivumelwano lomuyi owayekhokhela lelibandla, uMnu. Joshua Mqabuko Nkomo.
Kusenjalo, uMnu. Dumiso Dabengwa, osekhokhela iZAPU, utshele uSithandekile Mhlanga weStudio 7 ukuthi ibandla lakhe lizimisele ukuncintisa lokunqoba kukhetho oluzayo lanxa lingatholi ithuba lokukhankasa elifana leliphiwa amabandla akuhulumende womanyano.