Iziphathamandla zikahulumende weZimbabwe lowe South Africa zibikwa zilokhu ziqhuba imihlangano eyokubona ukuthi izizalwane zeZimbabwe ezidinga incwadi ezifunekayo ukuthi zithole amapermits okuhlala lokusebenza kwele South Africa ngokusemthethweni ziyazithola lezincwadi ngesikhathi esifaneleyo.
EleZimbabwe, ebelidinda ama passport angamakhulu amahlanu kuphela ngelanga, libikwa lisithi selengezelele inani lalezincwadi ngelanga, njalo selisemukela imitshina emibili eyokutshetshisa lumsebenzi elawuthenjiswa nguhulumende we South Africa.
UMmnu. Ngqabutho Dube, isiphathamandla se Stakeholders’ Forum, inhlanganiso ebona ngamalungelo abadinga ukuhlala ngokusemthethweni kwele South Africa, utshele uSithandekile Mhlanga weStudio 7 ukuthi kufanele uhulumende we Zimbabwe akhuthale njengowe South Africa ukuthi uhlelo lwama permits luphumelele.