Iqula lebandla leMDC ekhokhelwa nguMnu. Morgan Tsvangirai elicubungula ngokusetshenziswa kwemali ecatshangelwa ukuthi yatshaphazwa, liqale umsebenzi ngoMvulo. Leliqula likhokhelwa ngumphathintambo wezamanzi, uMnu. Sam Sipepa Nkomo. Abanye abakuleliqula ngunkosazana Thabitha Khumalo, omela iBulawayo East edale lephalamende loNkosazana Rumbidzai Nyamayemombe obona ngokuhanjiswa kwemali kulelibandla.
Elinye ilunga lekhomidi yeMDC yakweleBhilitane, eyamiswa umsebenzi kulandela imbiko yokutshaphazwa kwemali, litshele iStudio 7 ukuthi leliqula selikhulume lamalunga ambalwa alelibandla lacubungula lamabhuku emali.
Ingcwethi ecubungula ezombusazwe, uMnu. Bekithemba Mhlanga utshele uChris Gande weStudio 7 ukuthi leliqula alisoze laphuma lalutho ngoba bekumele lumsebenzi wenziwe ngabantu abangayisibo balelibandla.