Idale leHigh Court eHarare selilahle isicelo senkampani yeAfrican Consolidated Resources esokuthi lihlaziye ngokuphangisa ingxabano ekhona phakathi kwayo, iCanadile leMbada Diamonds ngodaba lwamadayimana enjiwa eMarange.
Inkampani le ibifuna idale lihlaziye udaba lolu masinyane njalo livimbe amankampani womabili ukuthi engathengisi amadayimana awemba eMarange ngoba isithi amatshe la enjiwa endaweni yayo.
Kodwa umahluli weHigh Court uBharat Patel ulahle isicelo lesi ngoMvulo esithi udaba lolu alubalulekanga okokuthi lungahluzwa ngesiphangiphangi.
Lokhu kutsho ukuthi udaba lwenkampani le soluzathatha isikhathi eside ukuthi luhluzwe, njalo iMbada leCanadile abikwa ezaqhubeka ngokuthengisa amadayimana la.
Ukuhlaziya udaba lolu uNtungamili Nkomo weStudio 7 uxhume ingcwethi ecubungula ezombusazwe uMnu Qhubani Moyo yena othi uhulumende kumele alungisise ingxabano ekhona phakathi kwamankampani la.